Tags-Chehra

khaḌī huuñ aaj bhī maiñ sañg-e-mīl kī sūrat
'kiran' kisī kā zamāne se intizār bhī hai

bādal uThe haiñ chashmak-e-barq-o-sharār hai
muñh dekhte ho sūrat-e-dīvār kuchh kaho

garebāñ chaak āñkheñ surḳh barham kākul-e-pechāñ
ye kyā sūrat banā.ī haa.e tum ne ġham meñ dushman ke

shā.iroñ kī nazar se mat dekho
duniyā dar-asl ḳhūbsūrat hai

izzat kī koī sūrat dikhlā.ī nahīñ detī
chup rahiye to chashmak hai kuchh kahiye to gaalī hai

ek jā bhī nazar aa.ī na asar kī sūrat
girtī paḌtī na kahāñ āh-e-dil-e-zār phirī

chal base vo din ki yāroñ se bharī thī anjuman
haa.e afsos aaj sūrat-āshnā miltā nahīñ

sabza-e-jāñ ke harā-bharā rahne kī ek yahī sūrat hai
sūkhā paḌte hī āñkhoñ kī nahreñ jaarī kar lete haiñ

āñsuoñ ke chand qatroñ se thī tar puurī kitāb
har varaq par ek sūrat mā.el-e-guftār thī

inkishāf-e-shahr-e-nā-mālūm thā har sher meñ
tajrabe kī tāza-kārī sūrat-e-ash.ār thī

aap to sher meñ mafhūm kī sūrat hote
lafz hotā jo koī aap ko pahnāne kā

kisī kī ḳhush-rañg guftugū kī miThās sheroñ meñ Dhal ga.ī hai
hamārī āñkhoñ ke ḳhvāb-dāñ se tumhārī sūrat nikal ga.ī hai

kohsāroñ kī guuñj kī sūrat phail gayā hai vo
maiñ ne apne-āp meñ chhup kar jise pukārā thā

na hūñgā maiñ to mirī dāstān hogī 'nazar'
zamīñ pe dhuup kī sūrat maiñ phail jā.ūñgā

raqs-farmā zehn meñ hai ab bhī vo sūrat 'sahar'
jaate jaate apnī yādoñ kā ḳhazāna de gayā

dard kī sūrat meñ vo umda sā tohfa de gayā
bevafā duniyā meñ jiine kā sahārā de gayā

jalva-e-ma.anī nazar aane lagā
piite piite mai ye sūrat ho ga.ī

kahāñ bardāsht ho saktā hai ye mujh se kisī sūrat
samar pakne se pahle hī koī haqdār ho paidā

sūrat-e-sailāb mazmūñ kā asar baḌhtā gayā
'nūh'-e-tūfānī kī ġhazleñ ḳhuub shohrat pā ga.iiñ

kah ga.e 'ahsan' ke muñh par aaj vo
terī sūrat se bhī nafrat ho ga.ī