Tags-Chehra

dekhne kī thī nigāhoñ meñ anā kī sūrat
us giraftār ne jab mujh ko giraftār kiyā

duur se ḳhud mirī sūrat mujhe lagtī hai bhalī
jaane kyuuñ paas se har shaḳhs burā lagtā hai

vaj.h baaqī mire ma.anī ko samajh
sūrat albatta hai faanī merī

maiñ qaidī huuñ yā qaa.id huuñ tujhe kyā
maiñ har sūrat qayādat kar rahī huuñ

isbāt na ho dāva-e-ḳhūñ us pe ilāhī
sūrat mire qātil kī badal jaa.e to achchhā

zamīñ kī aarzū sairāb ho kisī sūrat
samundaroñ meñ jazīre ubharnā chāhte haiñ

tere qurbān 'qamar' muñh sar-e-gulzār na khol
sadqe us chāñd sī sūrat pe na ho jaa.e bahār

vo chehra kitābī rahā sāmne
baḌī ḳhūbsūrat paḌhā.ī huī

dikhā.ī detī hai masḳh 'nayyar' hasīn sūrat bhī zindagī kī
qusūr hai ā.īne kā is meñ ki hai ye ā.īna-gar kā dhokā

musalmāñ dekh kar us but kī sūrat ko ye kahtā hai
musalmānī kahāñ kii? bāñdh le zunnār, ho kāfir

sub.h kaisī hai vahāñ shaam kī rañgat kyā hai
ab tire shahr meñ hālāt kī sūrat kyā hai

sūrat to ek hī thī do ghar hue to kyā hai
dair-o-haram kī bābat jhagḌe fuzūl Daale

sar par taaj kī sūrat dhar dī us ne īñdhan kī gaThrī
ishq ne kaise ḳhush-qismat ko shaah se lakaḌhārā kiyā

dil ko ik sūrat bhaa.ī thī is amboh meñ par ham ne
jaane is afrā-tafrī meñ kis kī samt ishāra kiyā

maiñ kisht-e-zīst meñ fasloñ kī sūrat
kuchh aañsū bo ga.ī huuñ rafta rafta

āñkhoñ kī dahlīz pe aa kar baiTh ga.ī
terī sūrat ḳhvāb sajā kar baiTh ga.ī

dair-o-ka.aba meñ tafāvut ḳhalq ke nazdīk hai
shāhid-e-ma.anī kā har sūrat hai ghar donoñ taraf

qaid se pahle bhī āzādī mirī ḳhatre meñ thī
āshiyāna hī mirā sūrat-numā-e-dām thā

bahār-e-husn javāñ-marg sūrat-e-gul-e-tar
misāl-e-ḳhār magar umr-e-dard-e-ishq darāz

ab badalnā hī paḌegā ye tarīq-e-zindagī
ab mirī jaañ sūrat-e-hālāt-e-duniyā aur hai