Tags-Chehra

maiñ dil ko chiir ke rakh duuñ ye ek sūrat hai
bayāñ to ho nahīñ saktī jo apnī hālat hai

sūrat-e-hāl dekh kar sab ko hai fikr ye ki ab
jism amaañ meñ ho na ho kaj to kulāh meñ rahe

'shauq' hai terā muntazir kab se
ab to sūrat dikhā hijāb na kar

din kī sūrat mujh ko bhī khā jā aa kar
maiñ bhī huuñ behosh añdherī raat

sūrat-e-sabza-e-be-gāna chaman se guzre
ham musāfir kī tarah apne vatan se guzre

dekhnī hai kabhī ā.īne meñ apnī sūrat
ik muḳhālif ko taraf-dār kiyā jaanā hai

maiñ tire vāste ā.īna thā
apnī sūrat ko taras ab kyā hai

tirā sā qad ban sakā na hargiz tirī sī sūrat na bin sakī phir
agar-che saan.e ne lākhoñ naqshe bigāḌ Daale banā banā kar

nigah kī sūrat phiro na har sū hijāb tum mardumuk se sīkho
ab aao āñkhoñ meñ sair dekho mizha kī chilman uThā uThā kar

jāntī huuñ ab use maiñ pā nahīñ saktī magar
har jagah saa.e kī sūrat saath kyuuñ chaltā rahā

kūcha-e-subh meñ jā pahuñche ham
sūrat-e-mauj-e-sabā pahuñche ham

jaan par kaun dam nahīñ detā
sūrat aisī thī log marte rahe

ik vāda-e-fardā kī ummīd pe zinda huuñ
ai kaash kisī sūrat ye raat guzar jaa.e

rūdād-e-shab-e-ġham yuuñ Dartā huuñ sunāne se
mahfil meñ kahīñ un kī sūrat na utar jaa.e

ḳhūn-e-jigar kā hāsil ik sher-e-tar kī sūrat
apnā hī aks jis meñ apnā hai rañg bharnā

tū jo jaatā hai vahīñ nit dauḌ dauḌ ai 'mus.hafī'
aur kyā duniyā ke saare ḳhūbsūrat mar ga.e

aap insāñ huā sūrat kā asiir
shīsha TuuTe to sikandar dekhe

bhulānā hai bahut mushkil magar phir bhī bhulānā hai
tirī yādoñ ko dil se ab to har sūrat miTānā hai

nazar aa.e kyā mujh se faanī kī sūrat
ki pinhāñ huuñ dard-e-nihānī kī sūrat

hifāzat kī koī sūrat nikal aatī hai aksar
maiñ tum ko DhūñD hī letā huuñ kho jaane se pahle