Tags-Chehra

terī sūrat se kisī kī nahīñ miltī sūrat
ham jahāñ meñ tirī tasvīr liye phirte haiñ

bujhtī hī nahīñ tishnagī-e-dil kisī sūrat
ai abr-e-karam aag hī barsā ke guzar jā

merī ummīd meñ hai yaas kī sūrat muzmar
merī hastī hai fanā misl-e-ḳhat-e-āb mujhe

phir baḌhā josh-e-junūñ sūrat-e-sailāb mujhe
phir kahīñ ġharq na kar de koī girdāb mujhe

be-sūrat be-jism āvāzeñ andar bhej rahī haiñ havā.eñ
band haiñ kamre ke darvāze lekin khiḌkī khulī huī hai

mirī sachchā.ī har sūrat tirī muTThī se niklegī
añgūThī gir ke dariyā meñ kisī machhlī se niklegī

pyārī sūrat vo haa.e kyā hogī
jis ko be-dekhe pyaar aatā hai

hasrat bharī āñkhoñ meñ ik pal ke liye aa jā
dekhe jo terī sūrat dīvāna bahal jaa.e

ai sanam jis ne tujhe chāñd sī sūrat dī hai
usī allāh ne mujh ko bhī mohabbat dī hai

shauq tauf-e-haram-e-kū-e-sanam kā din raat
sūrat-e-naqsh-e-qadam Thokareñ khilvātā hai

vo sūraj kī pahlī kiran le ke apne gharoñ se chale jab
to chehre gulāboñ kī sūrat khile the

tumhāre jaane ke baad bhī silvaToñ kī sūrat
udaas bistar pe ḳhush-gumānī paḌī huī hai

imtiyāz-e-sūrat-o-ma.anī ke parde chaak haiñ
yā tire chehre pe mastī kī ghaTā chhā.ī huī

bahut hī shā.istagī se har lamha Dūbtī ik sadā kī sūrat
maiñ ḳhalvat-e-jāñ meñ bujh rahā huuñ mujhe duāoñ meñ yaad rakhiye

zamāna zāhirī sūrat meñ aib DhūñDhtā hai
mujhe gumāñ hai ki dil se hasīn huuñ ḳhush huuñ

hai vo kitnā ḳhūbsūrat har adā bhī dil-nashīñ
us kī bāteñ mīThī mīThī par asar nashtar kā hai

sūrat-e-sahar jā.ūñ aur dar-ba-dar jā.ūñ
ab to faisla Thahrā raat se guzar jā.ūñ

ek sūrat dikhā.ī dene lagī
maiñ ne dil meñ ajab shigāf kiyā

kyā kushūd-e-kār kī 'barqī' koī sūrat nahīñ
sab ke hai vird-e-zabāñ ab sirf dushvārī kā naam

vahāñ se bhī guzar aayā huuñ ḳhāmoshī meñ ab ke
jahāñ ik shor kī sūrat bapā honā thā mujh ko