Tags-Falak

koī sitāra-e-shab yā ġhubār thā vo bhī
zamīñ pe nāz-e-falak kā shumār thā vo bhī

jo nuur bharte the zulmāt-e-shab ke sahrā meñ
vo chāñd taare falak se utar ga.e shāyad

ai ishq falak par tujhe likhā jo ḳhudā ne
phir terā muqaddar bhalā ib.hām huā kyuuñ

kyā kahā toḌ ke lāoge falak se taare
dekho in bātoñ se ham shaad nahīñ hone ke

falak aur use jhukā.e sar-e-manzil-e-safīhāñ
malak aa.eñ jis ke dar par ba-havā-e-jab.ha-sā.ī

daanā na us ko samjhiye jo ġhair ḳhāmushī
dil ḳhasta ho falak ke kare āsiyā se bahs

vahī aah asl meñ aah hai vahī naala asl meñ naala hai
ki idhar jo dil se nikal paḌe to udhar falak meñ ho thartharī

zamīñ pe raat bichhī hai idhar shikasta umiid
falak pe chāñd ugā hai udhar udaas udaas

apne mizāj hī ke ta.āqub meñ huuñ hanūz
farsh-e-sifāl bhī falak-e-chār meñ bhī hai

mere saanī na.ī hai koī ab jahāñ meñ
falak ke kañgūroñ ko maiñ ne chhiyā hai

ham ahl-e-dil haiñ kisī imtihāñ se kyā Darte
liyā falak ne tirā imtihāñ to kyā hogā

nairañg hai ek ek tirā diid ke qābil
ham ai falak-e-shobada-gar dekh rahe haiñ

kab mujh ko nikalnā thā ye hairat hai falak ko
maidān-e-zamīñ meñ maiñ abhī se nikal aayā

havā.eñ shāḳh-e-falak se sadā lagātī haiñ
ġhubār-e-rāh meñ rah pā.egī anā kab tak

zamīñ ke jism pe yuuñ yūrish-e-qazā kab tak
falak-nashīnoñ yūñhī ġham kā silsila kab tak

kanār-e-ābjū baiThe haiñ mast-e-nik.hat-e-sāġhar
nazar sū-e-falak aur haath hai miinā kī gardan meñ

gilā kyā karūñ ai falak batā mire haq meñ jab ye jahāñ nahīñ
kahūñ kaise hāl-e-dil un se maiñ mirī hiltī tak ye zabāñ nahīñ

tumhāre bin udāsī din pe aksar chhā.ī rahtī hai
shab-e-furqat falak par chāñd taarā kaun dekhegā

paayā siyāh-baḳhtī-e-ushshāq ne bhī auj
fīroza-e-falak pe kiyā kunda nām-e-zulf

milā hai ḳhāk-nashīnī se ye maqām mujhe
zamīñ hai taḳht falak taaj hai mire sar kā