Tags-Falak

zamīñ meñ ai 'shād' mar ga.e par falak dabā.e to kyā gila hai
miyān-e-turbat hamāre pahlū hameñ dabāte haiñ murda pā kar

ik falak aur hī sar par to banā sakte haiñ
kurra-e-arz ko behtar to banā sakte haiñ

sitāre Taañk diye haiñ falak kī chādar par
aur apnī chādar-e-shab be-navīd kar lī hai

Tuk ġhaur kar tū bū-qalmoñ kā falak ke Dol
ik rañg hai nayā hī har ik inqalāb meñ

gire agar sar-kashī ho mujh se abhī falak ko zamīñ pe paTkūñ
ki toḌ Daale maiñ aise miine hazāroñ shīshe uThā uThā kar

guloñ ke maḳhmaleñ āñchal namī se bhiig jaate haiñ
kisī kī yaad meñ shab bhar falak aañsū bahātā hai

bārhā nanhā sā dil ḳhuun huā zer-e-falak
ġhunche par guzrī hai kyā kyā gul-e-tar hone tak

kab khulegā ki falak paar se aage kyā hai
kis ko mālūm ki dīvār se aage kyā hai

abr-e-rahmat se to mahrūm rahī kisht mirī
koī bijlī hī falak tū ne girā.ī hotī

falak-nashīñ sahī merā ḳhudā magar 'mohsin'
kabhī kabhī vo zamīñ par utar bhī aatā hai

kaho sitāra-shanāso falak kā haal kaho
ruḳhoñ se parda-kushā.ī kā vaqt hai ki nahīñ

falak ke dāman pe chāñd taare nahīñ daraḳhshāñ to kyā 'nujūmī'
hazāroñ armāñ kā ḳhuun de kar maiñ shab ko rañgīñ banā rahā huuñ

yaqīn maano ki bijliyāñ bhī falak se aa kar panāh leñgī
chaman meñ sulh-o-safā ke tinkoñ se āshiyāna banā rahā huuñ

kisī ko paar utāregā falak kyā
usī kī naav chakkar meñ paḌī hai

vo chaar chāñd falak ko lagā chalā huuñ 'qamar'
ki mere ba.ad sitāre kaheñge afsāne

falak kā thaal hī ham ne ulaT Daalā zamīñ par
tumhārī tarh kā koī sitāra DhūñDne meñ

kisī kā dil ko rahā intizār saarī raat
falak ko dekhā kiye baar baar saarī raat

thī jin se falak-bos pahāḌoñ ko girānī
vo sadme bhī 'nāsir' dil-e-ġhamnāk se uTThe

mujh ko dekhā to falak-zād rafīqoñ ne kahā
is sitāre kā muqaddar hai zamīñ par honā

nazar nazar meñ hazāroñ savāl haiñ lekin
falak se koī mirī samt dekhtā bhī to ho