Tags-Gulshan

nāzir-e-gul pāsbān-e-rañg-o-bū gulshan-panāh
nāz-parvar lahlahātī khetiyoñ kā bādshāh

kaun hal zulmat-shikan qindīl-e-bazm-e-āb-o-gil
qasr-e-gulshan kā darīcha sīna-e-gītī kā dil

sunsān bayābānoñ meñ hai ik jazba-e-gulshan-ārā.ī
vīrāñ khañDaroñ meñ letā hai mahloñ kā tasavvur añgḌā.ī

aur hī rañg pe hai aaj bahār-e-gulshan
sair ke vāste aa.e haiñ azīzān-e-vatan

kis ko ma.alūm thī is gulshan-e-aḳhlāq kī raah
maiñ ne phūloñ ko kiyā rañg-e-vafā se āgāh

ye nasīm-e-saharī aaj ḳhabar laa.ī hai
saal guzrā mire gulshan meñ bahār aa.ī hai

jo vā bhī ho qafas kā dar to ham us se na hoñ bāhar
nahīñ dil meñ hamāre valvale ab sair-e-gulshan ke

mahfil mahfil jis ke charche gulshan gulshan jai-jai-kār
ham ne usī ke haath meñ yaaro aksar ḳhanjar dekhā hai

firāqe-e-gul se jo nāla-kash hai qafas meñ bulbul shahīd-e-jalva
bahār-e-gulshan ḳhizāñ-numā hai junūñ-zada abr-e-bahmanī hai

baiThe baiThe vo kiyā karte haiñ har gul pe nazar
dil-e-āshiq hai magar sair kā gulshan un kā

agar vo sarv-qad garm-e-ḳhirām-e-nāz aa jaave
kaf-e-har-ḳhāk-e-gulshan shakl-e-qamrī nāla-farsā ho

atā kī nahr-e-gulshan us ne apne ishq-bāzoñ ko
ijāzat dī yahāñ nikhre nahā.e jis kā jī chāhe

nahīñ hotā hai muhtāj-e-numā.ish faiz shabnam kā
añdherī raat meñ motī luTā jaatī hai gulshan meñ

shajar sakte meñ haiñ ḳhāmosh haiñ bulbul nasheman meñ
sidhārā qāfila phūloñ kā sannāTā hai gulshan meñ

shabāb aayā hai paidā rañg hai ruḳhsār-e-nāzuk se
faroġh-e-husn kahtā hai sahar hotī hai gulshan meñ

jahāñ meñ rah ke yuuñ qaa.em huuñ apnī be-sabātī par
ki jaise aks-e-gul rahtā hai āb-e-jū-e-gulshan meñ

jinheñ sīñchā thā ḳhūn-e-dil se agle bāġhbānoñ ne
taraste ab haiñ paanī ko vo paude mere gulshan meñ

havā-e-tāza dil ko ḳhud-baḳhud bechain kartī hai
qafas meñ kah gayā koī bahār aa.ī hai gulshan meñ

uḌā kar le ga.ī bād-e-ḳhizāñ is saal us ko bhī
rahā thā ek barg-e-zard baaqī mere gulshan meñ

garāñ thī dhuup aur shabnam bhī jin paudoñ ko gulshan meñ
tirī qudrat se vo phūle-phale sahrā ke dāman meñ