Tags-Gulshan

bahāna chāhiye gulshan meñ Darne vāloñ ko
na ḳhaar hote to phūloñ se Dar ga.e hote

ik khel musalsal gardish kā dekhā hai ham ne gulshan meñ
phūloñ kā khil kar murjhānā aur kaliyoñ kī kilkārī bhī

nasheman hī ke luT jaane kā ġham hotā to ġham kyā thā
yahāñ to bechne vāloñ ne gulshan bech Daalā hai

is gulshan-e-jahāñ meñ sab hai bahār apnī
gar qumrī haiñ to ham haiñ shamshād haiñ to ham haiñ

gulshan-e-dahr meñ sau rañg haiñ 'hātim' us ke
vo kahīñ gul hai kahīñ bū hai kahīñ buuTā hai

ham ko is kī kyā ḳhabar gulshan kā gulshan jal gayā
ham to apnā sirf apnā āshiyāñ dekhā kiye

ai kāshif-e-soz-e-hastī sun hai tujh meñ nihāñ asrār kī bū
gar terā guzar gulshan se huā har baat nikālī jā.egī

yaad kar ke ḳhayāl gul-rū kā
dasht-e-dil meñ bahār-e-gulshan kar

nāla-sanjī-e-anādil se ye chaltā hai pata
naam ko bū-e-vafā arbāb-e-gulshan meñ nahīñ

us gul ko josh-e-gul meñ ye kah kar ubhāriye
gulshan meñ andalīb ko chal kar pukāriye

ġhunche ke chaTakne pe na gulshan meñ ḳhafā ho
mumkin hai kisī TuuTe hue dil kī sadā ho

sehn-e-gulshan meñ hasīñ phuul khile the kab se
ham hue ḳhud hī tamāshā.ī bahut der ke ba.ad

bū-e-gul bād-e-sabā laa.ī bahut der ke ba.ad
mere gulshan meñ bahār aa.ī bahut der ke ba.ad

kāvish-e-dām-o-qafas mere liye thī goyā
varna gulshan hai vahī aaj bhī sayyād nahīñ

gayā jo gulshan meñ merā gul-rū to kaliyāñ phūloñ kī pā ke qaabū
balā.eñ letī haiñ us kī chaT-chaT kabhī idhar ko kabhī udhar ko

ki yuuñ manzar badal jaane se hairānī nahīñ hotī
agar gulshan meñ rahnā ho to sahrā dekhte rahiye

kyā zarroñ kā josh sabā ne chhīn liyā
gulshan meñ kyuuñ yaad bagūle aate haiñ

maiñ apne gulshan meñ mausamoñ ke azaab gin gin ke thak gayā huuñ
maiñ kaise kah duuñ bahār aa.ī maiñ kaise kah duuñ bahār dekhī

gulshan kī bahāroñ meñ tujhe DhūñD rahā huuñ
ākāsh ke tāroñ meñ tujhe DhūñD rahā huuñ

ham hañse to āñkhoñ meñ tairne lagī shabnam
tum hañse to gulshan ne tum pe phuul barsā.e