Tags-Hadsa

shahr jal bujh gayā log mar kab ga.e
sub.h-e-nau kal nayā hādisa dekhiye

fasīl-e-jism pe kuchh naqsh chhoḌ jā.egā
jo hādisa mire dil par guzarne vaalā hai

sar-e-rāh mil ke bichhaḌ ga.e thā bas ek pal kā vo hādsa
mire sehn-e-dil meñ muqīm hai vahī ek lamha azaab kā

shorīda-sar vo huuñ ki use sar se toḌ duuñ
gar sañg-e-hādsa bhī gire āsmān se

maiñ us ko dekh ke phir kuchh na dekh pā.ūñgā
ye hādisa bhī mujhī par guzarne vaalā thā

sukūt TūTne vaalā hai hādsa hogā
maiñ jāntā huuñ ki phir koī sāneha hogā

āñkhoñ āñkhoñ meñ huā ik hādisa achchhā lagā
milne vaale kyuuñ tujhe ye fāsla achchhā lagā

ġham nahīñ ham tabāh ho ke rahe
hādsa bhī to nā-gahāñ na rahā

kisī ke saath ga.iiñ dil kī dhaḌkaneñ 'qaisar'
phir is ke ba.ad mohabbat kā hādisa na huā

kal ujāloñ ke nagar meñ hādsa aisā huā
chaḌhte sūraj par diye kī hukmarānī ho ga.ī

hādisa saḳht thā jāñkāh thā ab ke yaaro
varna ham ne to kabhī haar nahīñ maanī thī

khiñchne vaalā hai āsmāñ sar se
hādisa ye bhī hone vaalā hai

har lamha koī hādisa roke hai mire paañv
har pal kisī ḳhvāhish kā taqāzā bhī huā hai

josh-e-junūñ meñ chupke se shah-rag hī kaaT lī
kahne ko ko log kahte rahe hādisa huā

maut ke be-rahm hāthoñ ko bahāne kī talāsh
zindagī ke saath koī hādisa honā hī thā

rulātī haiñ mirī yādeñ hamesha ḳhuun ke aañsū
kisī nādār pe guzrā huā ik hādsa huuñ maiñ

maiñ saañs lete za.iif jismoñ meñ rah chukā huuñ
maiñ hādisa huuñ udaas logoñ meñ rah chukā huuñ

sunā hogā hamārā hādsa bhī
hamāre shahr meñ tum to rahe ho

shab meñ thiiñ chāroñ taraf shādābiyāñ
hādisa vaqt-e-sahar kuchh aur hai

ik ḳhalish ik karb pinhāñ merī ḳhākistar meñ hai
merā dushman hādisa ye hai ki mere ghar meñ hai