Tags-Hasrat

qarnoñ kī ḳhamoshī ko hasrat hai sail-e-bayāñ ban jaane kā
sadiyoñ kī udāsī ko zid hai ik nutq-e-javāñ ban jaane kā

uzr-e-vāmāndagī ai hasrat-e-dil
naala kartā thā jigar yaad aayā

hasrat ke sadqe aañkh ke malte hī khul gayā
vo kuchh ki mumkināt se jis kā bayāñ na thā

nā-karda gunāhoñ kī bhī hasrat kī mile daad
yā rab agar in karda gunāhoñ kī sazā hai

tirchhī nazar se dekhiye talvār chal ga.ī
zaḳhm-e-jigar kī raah se hasrat nikal ga.ī

dil-e-āshiq meñ hasrat bhī hai armāñ bhī tamannā bhī
vo jis bastī meñ rahte haiñ baḌī ābād bastī hai

sunā hai maqtal meñ aaj koī qatīl-e-hasrat shahīd hogā
huī jo shohrat ye shahar meñ hai har ik taraf ek sansanī hai

ba-qadr-e-hasrat-e-dil chāhiye zauq-e-ma.āsī bhī
bharūñ yak-gosha-e-dāman gar āb-e-haft-dariyā ho

charāġh-e-yās-o-hasrat ham haiñ mahfil meñ hasīnoñ kī
jalā.e jis kā jī chāhe bujhā.e jis kā jī chāhe

ai ḳhaar ḳhār-e-hasrat kyā kyā figār haiñ ham
kyā haal hogā us kā jis dil meñ ḳhaar haiñ ham

ye ishq par husn kī ināyat ye husn se ishq kī irādat
hamārī hasrat hai aur tū hai tirī javānī hai aur ham haiñ

baḌhā.e vādī-e-hasrat meñ kyā qadam koī
ki ḳhizr-e-rāh bhī gum aur raah bhī masdūd

vasī.a bazm-e-jahāñ hai to ho mujhe kyā kaam
jagah milī na mirī hasrat-dilī ke liye

sūrat jo ek ek kī taktā hai aa.ina
hasrat ye hai surāġh-e-sikandar lagā.iye

sabz baaġh aatā hai duniyā kā nazar jab 'ra.anā'
yaad aatī hai bahut hasrat-e-shaddād mujhe

jo niklī hogī koī aarzū to ye bhī niklegā
tumhārā tīr-e-hasrat ban gayā dil meñ nihāñ ho kar

ghaTā.eñ ghir ke kyā kyā hasrat-e-farhād par roiiñ
chaman tak aa ga.iiñ nahreñ pahāḌoñ se ravāñ ho kar

haa.e re hasrat-e-dīdār mirī haa.e ko bhī
likhte haiñ hā-e-do-chashmī se kitābat vaale

kitnī hasrat se tirī aañkh kā bādal barsā
ye alag baat mirā shola-e-ġham bujh na sakā