Tags-Jalwa

bahut ḳhafīf thī kaun-o-makāñ kī jalvagarī
mirī nigāh kā gosha bhī jagmagā na sakā

un kā jalva huā hai pesh-e-nazar
justujū kāmrān hotī hai

ujlī ujlī pahāḌiyoñ par 'zeb'
rañg utrā hai jalva-gāhoñ sā

na thī tā-sub.h kuchh hājat charāg o sham.a o mish.al kī
hamārī bazm meñ shab jalva-gar vo māh-e-paikar thā

gar nāz-ḳhud-ārā ko hai yaktā.ī kā da.avā
kyuuñ ā.īna dekhā ki hue jalva-numā do

jalva nigāh meñ hai kisī be-niyāz kā
putlī hamārī aañkh kī putlā hai naaz kā

yahāñ jo kuchh hai husn-e-lā-makāñ ke mā-sivā kyā hai
magar jalva hī jalva hai to merā aa.ina kyā hai

us ke hote bhī maiñ ik ehsās-e-tanhā.ī meñ huuñ
jalva-gar hai vo jo muddat se dil-e-āgāh meñ

tasavvur ne dikhāyā shāhid-e-maqsūd kā jalva
utar aa.ī hai lailā sar-zamīn-e-dil pe mahmil se

jalve kā va.ada qayāmat pe kiyā thā mauqūf
aap ke hijr meñ sau baar qayāmat dekhī

naqāb uTThī to apnā aalam na tark-e-jalva na tāb-e-jalva
nazar uThī baar baar lekin jhapak ga.iiñ baar baar āñkheñ

but-tarāshī chār-sū hai jalva-gar
de ga.ī sab kī jabīnoñ ko nishāñ

nākām hī tā-umr rahā tālib-e-dīdār
har jalva tirā ba.ad ko pardā nazar aayā

har chiiz meñ aks-e-ruḳh-e-zebā nazar aayā
aalam mujhe sab jalva hī jalva nazar aayā

hujūm-e-jalva-o-nairañgī-e-tamannā se
tamām mausam-e-gul mausam-e-havas guzrā

kis ne jalva dikhā diyā hai aaj
zamzama-sanj-e-al-amāñ huuñ maiñ

izn-e-jalva hai jhalak bhar ke liye
aañkh bhar kar dekhnā achchhā nahīñ

shāyad ik bhūlī tamannā miTte miTte jī uThe
aur bhī is jalva-zār-e-rañg-o-bū meñ ghūmiye

ham kitne ḳhush-nasīb haiñ jo aap mil ga.e
dekhā jo jalva aap kā behosh ho ga.e