Tags-Khuda

mujh se vo kaise baḌā hai kahiye
jab ḳhudā merā chhupā hai mujh meñ

nā-ḳhudā kī himmat kā imtihān letī hai
varna kad nahīñ kuchh bhī mauj kī safīnoñ se

samjhegā aadmī ko vahāñ kaun aadmī
banda jahāñ ḳhudā ko ḳhudā māntā nahīñ

ḳhudā gavāh hai un ko bhī de rahā huuñ duā
jo kaste rahte haiñ 'shākir' pe roz āvāza

ḳhudā bhī merī tarah bā-kamāl aisā thā
tarāshā us ko jo mere ḳhayāl aisā thā

butoñ ko dekh ke sab ne ḳhudā ko pahchānā
ḳhudā ke ghar to koī banda-e-ḳhudā na gayā

kisī ke naam pe nanhe diye jalāte hue
ḳhudā ko bhuul ga.e nekiyāñ kamāte hue

ḳhudā ne kholā hai ye raaz jin pe aalam meñ
vo jānte haiñ ki māhiyyat-e-ashar kyā hai

tire baġhair koī aur ishq ho kaise
ki mushrikoñ ke liye bhī ḳhudā zarūrī hai

maiñ jazb o bast kī manzil meñ qaid huuñ kab se
mire ḳhudā tū farārī kā rāsta kar de

girā ḳhud apnī nazar se to pūchhtā phir kaun
ḳhudī gañvā.ī to mujh ko ḳhudā kahīñ na milā

guzar kar ham ḳhudī vahm-o-gumāñ se
ḳhudā jaane kahāñ tak aa ga.e haiñ

tujhe dard kyuuñ ki sunā.ūñ maiñ na ḳhudā kisī ko dikhā.e ye
jo kuchh apne jī pe guzartī hai kahūñ kyā ki us kā bayāñ nahīñ

paḌī jis taraf ko nigāh yaañ nazar aa gayā hai ḳhudā hī vaañ
ye haiñ go ki āñkhoñ kī putliyāñ mire dil meñ jaa.e butāñ nahīñ

ḳhudā jo shāna hameñ banātā to ham ḳhalish hote apne dil kī
ḳhudā jo ā.īna ham ko kartā to apne hairān-kār hote

jo gard kar ke ḳhudā uḌātā to uḌte gard-e-malāl ho kar
jo sañg kar ke ḳhudā jamātā to jam ke lauh-e-mazār hote

jo uzv-e-bātin ḳhudā banātā to ham dil-e-be-qarār hote
jo uzv-e-zāhir ḳhudā banātā to dīda-e-ashk-bār hote

ġharaz ki aisā musībatoñ kā hamāre dil ko mazā paḌā hai
ki 'qadr' ham ko ḳhudā banātā to ho ke be-qadr ḳhvār hote

jo roz ham ko ḳhudā banātā to bante roz-e-firāq-e-jānāñ
jo raat ham ko ḳhudā banātā to ham shab-e-intizār hote

kyuuñ mirī shakl pahan letā hai chhupne ke liye
ek chehra koī apnā bhī ḳhudā kā hotā