Tags-Khuda

bachche ne titlī pakaḌ kar chhoḌ dī
aaj mujh ko bhī ḳhudā achchhā lagā

sab kī peshāniyāñ sajdoñ se munavvar haiñ yahāñ
ai ḳhudā tere gunahgār kahāñ kho ga.e haiñ

jo hai ḳhudā kā aadmī us kī hai saltanat alag
zulm ne zulm se agar haath milā liyā to kyā

ab kahīñ boltā nahīñ ġhaib jo kholtā nahīñ
aisā agar koī ḳhudā tum ne banā liyā to kyā

ik vahī apnā ḳhudā hai ik vahī hai apnā but
jis ke dar par sar jhukā dene se sar ūñchā huā

kabhī na phuul se chehre pe gard-e-yās jame
ḳhudā kare ki use ishq kī havā na lage

marja.a-e-gabr-o-musalmāñ hai vo but nām-e-ḳhudā
bhejte haiñ use hindū o musalmāñ kāġhaz

kyā batā.ūñ koī īmān kahāñ lā.egā
ki ḳhudā ḳhvāb ke andar se nikaltā huā thā

ik chūmtī huī sī nazar Daal kar
'mas.ūd' tum ne ek sanam ko ḳhudā kiyā

jis ko maanā thā ḳhudā ḳhaak kā paikar niklā
haath aayā jo yaqīñ vahm sarāsar niklā

ai ḳhudā merī ragoñ meñ dauḌ jā
shāḳh-e-dil par ik harī pattī nikāl

tamām aalam huā jo shaidā to kuchh ta.ajjub nahīñ hai is kā
but-e-sitamgār tujh ko baḳhshā ḳhudā ne husn-o-jamāl kaisā

ḳhudā kare ki hameñ vo duā na koī de
hameñ to kosnā hī us kā raas lagtā hai

aa jā shab-e-furqat meñ qasam tum ko ḳhudā kī
ai maut bas ab der lagānā nahīñ achchhā

ye kyā kahā ki ahl-e-junūñ ab nahīñ rahe
'as.ad' jo tere shahr meñ banda ḳhudā kā hai

kahte haiñ log shahr to ye bhī ḳhudā kā hai
manzar yahāñ tamām magar karbalā kā hai

qudrat ḳhudā kī dekhiye pistān-e-yār meñ
paivand fālse kā lagā hai anaar meñ

to kyā rābta phir ḳhudā kā bashar se
ta.alluq nahīñ jab duā kā asar se

maiñ gaañv lauT rahā huuñ bahut dinoñ ke baad
ḳhudā kare ki use merā intizār na ho