Tags-Khuda

koī chārā nahīñ duā ke sivā
koī suntā nahīñ ḳhudā ke sivā

kasāfat ḳhatm kar ke jism kī miTTī kā putlā
ḳhudā ke kār-ḳhānoñ tak pahuñchnā chāhtā hai

havā hai ḳhauf-e-ḳhudā se ḳhālī
hai is nagar meñ balā kī dahshat

bīmār-e-mohabbat kā ḳhudā hai jo sambhal jaa.e
hai shaam bhī maḳhdūsh judā.ī kī sahar bhī

jaise ki 'nazīr' un rātoñ par qudrat bhī karam farmātī thī
bedār ḳhudā kar detā thā āñkhoñ meñ agar niiñd aatī thī

na faqīh koī samajh sakā na hī to sanam
ki ḳhudā se mere muāmalāt ajiib haiñ

har ek tadbīr be-asar hai na jī rahī huuñ na mar rahī huuñ
junūn-e-ishq-e-ḳhudā hī logo ye haal merā banā rahā hai

mujhe mālūm hai jo kuchh tamannā hai rasūloñ kī
magar kyā dar-haqīqat vo ḳhudā kī bhī tamannā hai

yuuñ samajh lo ki ba-juz nām-e-ḳhudā kuchh na rahā
jal ke is aag meñ sab ḳhaak huā kuchh na rahā

mujh ko bikhrāyā gayā aur sameTā bhī gayā
jaane ab kyā mirī miTTī se ḳhudā chāhtā hai

diloñ meñ rahiye jahāñ ke vale ḳhudā ke Dhab
ki ho jahāñ pe na zāhir ye hai mirā maz.hab

dīvār pe likkhī huī tahrīr hai kuchh aur
detī hai ḳhabar ḳhalq-e-ḳhudā aur tarah kī

ḳhudā kare na kare husn se tajāvuz-e-ishq
abhī to mujh se vahī kah rahe haiñ tū kyā hai

ḳhudā ke paak bandoñ ko hukūmat meñ ġhulāmī meñ
zirah koī agar mahfūz rakhtī hai to istiġhnā

mire habīb mirī muskurāhaToñ pe na jā
ḳhudā-gavāh mujhe aaj bhī tirā ġham hai

ḳhudā jaane girebāñ kis ke haiñ aur haath kis ke haiñ
añdhere meñ kisī kī shakl pahchānī nahīñ jaatī

ab bhī buland-tar haiñ sipāh-e-ḳhudā ke sar
parcham hai ab bhī chob-e-alam par chaḌhā huā

Toktā to maiñ nahīñ par in dinoñ nām-e-ḳhudā
ḳhuub chamke ho tumhārā rañg-e-rū kuchh aur hai

jahān-e-ḳhair meñ ik hujra-e-qanā.at-o-sabr
ḳhudā kare ki rahe jism o jaañ ke hote hue

maiñ tujh ko dekhūñ magar guftugū na kar pā.ūñ
ḳhudā ke vāste aisī na de sazā mujh ko