Tags-Khuda

maiñ apne jism ke andar simaT ke baiThā huuñ
bulā rahā hai kahīñ duur se ḳhudā mujh ko

badan par kuchh mire zāhir nahīñ aur dil meñ sozish hai
ḳhudā jaane ye kis ne raakh andar aag daabī hai

jo shaḳhs miim ke mafhūm tak nahīñ pahuñchā
ḳhudā kī shaan mohabbat sikhā rahā hai mujhe

mire ḳhudā mujhe itnā to mo'tabar kar de
maiñ jis makān meñ rahtā huuñ us ko ghar kar de

maiñ baaz aayā na laḌne se haar kar bhī 'fuzail'
mire ḳhudā kī haiñ mujh par ināyateñ kyā kyā

fareb-andar-fareb ātish-dar-ātish ai ma.āz-allāh
ḳhudā nā-karda fasl-e-gul tirā anjām kyā hogā

azm us ke vasl kā hai ai 'valī'
lekin imdād-e-ḳhudā darkār hai

tujhe ḳhabar hai tujhe yaad kyuuñ nahīñ karte
ḳhudā pe naaz ḳhudā-zād kyuuñ nahīñ karte

ḳhudā hī jaane ye sāda-lauhī dikhā.egī kyā natīja 'vahshat'
vo jitnī ulfat ghaTā rahe haiñ usī qadar maiñ baḌhā rahā huuñ

mazlūm-e-husn huuñ so na tanhā samajh mujhe
jis kā nahīñ hai koī to us kā ḳhudā bhī hai

na kuchh hosh apnā na hai kuchh ḳhabar
ḳhudā jaane 'sāhir' ko kyā ho gayā

lapak ke mujh ko gale lagāyā ḳhudā kī rahmat ne roz-e-mahshar
abhī sunāyā thā mohtasib ne mire gunah kā hisāb aadhā

tujhe tarāsh ke maiñ saḳht munfa.il huuñ ki log
tujhe sanam to samajhne lage ḳhudā mujh ko

ye muñh se to kahtā huuñ chhoḌī mohabbat
magar haal dil kā ḳhudā jāntā hai

kuchh aisī to dushman meñ ḳhūbī nahīñ hai
magar tū ḳhudā jaane kyā jāntā hai

sunā hai kuuch to un kā par is ko kyā kahiye
zabān-e-ḳhalq ko naqqāra-e-ḳhudā kahiye

'jauhar' is ek dil ke liye itne mashġhale
kī hai ḳhudā kī chaah to ishq-e-butāñ na ho

'nasīr' shor na kar fitna hovegā barpā
ḳhudā-na-ḳhvāsta ab gar vo mast-e-ḳhvāb uThā

ḳhudā ke vāste chehre se Tuk naqāb uThā
ye darmiyān se ab parda-e-hijāb uThā

safīna jab ki kināre pe aa lagā 'ġhālib'
ḳhudā se kyā sitam-o-jaur-e-nā-ḳhudā kahiye