Tags-Khuda

ḳhudā kī den nahīñ zarf-e-ḳhalq par mauqūf
ye dil bhī kyā hai jise dard kā ḳhazāna milā

maqām-e-ibrat hai aah ai dil ḳhudā hī kī hai panāh ai dil
nahīñ hai kuchh zād-e-rāh ai dil adam se tākīd hai safar kī

farzī ḳhudā banā.e sajde kiye butoñ ko
allāh-re karishme ehsās-e-kam-tarī ke

but-parastī meñ bhī bhūlī na mujhe yād-e-ḳhudā
haath meñ sub.ha gale meñ mire zunnār rahā

koī kuchh batā.egā kyā ho gayā
yahāñ kaise har but ḳhudā ho gayā

nāḳhudā ko ḳhudā kahā hai to phir
Duub jaao ḳhudā ḳhudā na karo

hāthoñ meñ mīzān laboñ par hukm-e-qazā hai
hākim-e-shahr bhī aksar ham ne ḳhudā se dekhe

na thā kuchh to ḳhudā thā kuchh na hotā to ḳhudā hotā
Duboyā mujh ko hone ne na hotā maiñ to kyā hotā

vo māntā hai mire iḳhtilāf ke haq ko
use biThāyā hai sar par ḳhudā nahīñ samjhā

jo kuchh dekhā na dekhā jo sunī vo an-sunī 'shā.ir'
na aa.e ham yahāñ ye zindagī muft-e-ḳhudā laa.ī

ḳhudā ke vāste saffākiyāñ ye kis se sīkhī haiñ
nazar se pyaar māñgā thā vo ik ḳhanjar uThā laa.ī

kyā hue aañkh ke parde jo paḌe the ab tak
barmalā hashr meñ kyuuñ aaj ḳhudā baiThā hai

apne marne kā zarā ġham na karo tum 'muztar'
yuuñ samajh lo ki jilāne ko ḳhudā baiThā hai

but-kade meñ tire jalve ne tarāshe patthar
jis ne dekhā yahī jaanā ki ḳhudā baiThā hai

chashm-e-vahdat se jo insān zarā ġhaur kare
jis ko dekhe yahī samjhe ki ḳhudā baiThā hai

duur kyuuñ jā.ūñ yahīñ jalva-numā baiThā hai
dil mirā arsh hai aur us pe ḳhudā baiThā hai

āsmāñ maiñ tirī gardish se nahīñ Dartā huuñ
tujh ko kis baat kā ġham sar pe ḳhudā baiThā hai

maiñ jo kahtā huuñ ki ka.abe ko na barbād karo
hañs ke but kahte haiñ kyā dil meñ ḳhudā baiThā hai

naqsh-e-vahdat hī suvaidā ko kahā karte haiñ
dil meñ ik til hai aur us til meñ ḳhudā baiThā hai

ḳhudā us ke dāman ko phūloñ se bhar de
mujhe pattharoñ se jo maarā kare hai