Tags-Khuda

paḌā hai jo dīvāna terī galī meñ
ḳhudā jaane kis ko pukārā kare hai

har aan dekhtā huuñ maiñ apne sanam ko shaiḳh
tere ḳhudā kā tālib-e-dīdār kaun hai

ik barhaman ne ye aa ke sehan-e-masjid meñ kahā
ishq jis patthar ko chhū le vo ḳhudā ban jā.egā

ummīd hai ki mujh ko ḳhudā aadmī kare
par aadmī kare to bhalā aadmī kare

ḳhudā rakkhe tujhe ābād 'sājid'
ġhazal tū ne banā lī hai dinoñ ba.ad

na ḳhud hī chain se baiThe na mujh ko baiThne de
mire ḳhudā ne sitāra bhī kyā diyā hai mujhe

lazzat-e-dīd ḳhudā jaane kahāñ le jaa.e
aañkh hotī hai to hotā nahīñ qaabū dil par

ḳhudā ke zikr kā mauqa nahīñ yahāñ 'sālik'
dayār-e-hind meñ husn-e-butāñ kī baat karo

bhūltā jaatā hai europe āsmānī baap ko
bas ḳhudā samjhā hai us ne barq ko aur bhaap ko

na ho jo banda-parvar bandagī ko bandagī us kī
janāb-e-dil ḳhudā ravāq koī aur ghar dekho

nahīñ bhartī tabī.at laakh dekho umr-bhar dekho
ḳhudā kī shaan hai aise bhī hote haiñ bashar dekho

lab-e-nigār ko zahmat na do ḳhudā ke liye
ham ahl-e-shauq zabān-e-nazar samajhte haiñ

ḳhudā ke rañg bhī sab khul ga.e haiñ
gunāh apne bhī maiñ kyūñkar ginūñgā

ḳhudā un kī chāhat se mahfūz rakkhe
ye āzār bhī muntaḳhab chāhte haiñ

ḳhatā kyā hai un kī jo us but ko chāhā
ḳhudā chāhtā hai to sab chāhte haiñ

haram se nikle talāsh-e-but meñ butoñ se yād-e-ḳhudā pe bigḌī
ġharaz ham āvāra-e-vafā haiñ kahīñ hamārā guzar nahīñ hai

munsif-e-vaqt haqīqat hai haqīqat hai ḳhudā
ḳhauf lāzim hai bahar-taur har ik hal ke liye

hazāroñ tishna jigar kis se hoeñge sairāb
ḳhudā ke vāste teġh-e-sitam ko aab to de

maiñ us kī ḳhaas ināyat se bach ga.ī huuñ 'qamar'
vagarna ḳhalq-e-ḳhudā to mujhe miTā detī

ḳhudā gavāh ki sar se jhaTak ke dekh liyā
nahīñ thā bas meñ vagarna use bhulā detī