Tags-Khuda

yuuñ to kartī nahīñ ibādat maiñ
jāntī huuñ magar ḳhudā kyā hai

mujhe nasīb huā zabt kā ḳhudā honā
ki mere hāthoñ sajā.ī ga.ī barāt us kī

laakh murtad sahī be-dīn nahīñ haiñ vaa.iz
but na.e haiñ to ḳhudā kyā na nayā lā.eñge ham

patthar ke ḳhudā vahāñ bhī paa.e
ham chāñd se aaj lauT aa.e

khelnā aag ke sho.aloñ se kuchh āsān nahīñ
bas ye ik baat ḳhudā-dād hai parvāne meñ

muqaddar us kā murjhānā hī to hai ba.ad khilne ke
kalī par yā-ḳhudā aa.e nikhār āhista āhista

balā-kashoñ kī duā hai ki ai ḳhudā na miTe
jigar kā daaġh ki chashm-o-charāġh-e-hijrāñ hai

hañs hañs ke baar baar na kyūñ-kar dikhā.eñ aap
nām-e-ḳhudā nikāle haiñ dandāñ na.e na.e

ka.abe ko jaatā kis liye hindostāñ se maiñ
kis but meñ shahr-e-hind ke shān-e-ḳhudā na thī

vo kab aa.eñ ḳhudā jaane sitāro tum to so jaao
hue haiñ ham to dīvāne sitāro tum to so jaao

maiñ kab kā TuuT ke 'haidar' bikhar gayā hotā
ḳhudā kā shukr tire dard kā sahārā thā

masjid ke zer-e-sāya ik ghar banā liyā hai
ye banda-e-kamīna ham-sāya-e-ḳhudā hai

tire saath hai tire paas hai na judā samajh vo judā nahīñ
ye ḳhudī kā parda uThā ke dekh agar haañ ḳhudā kī talāsh hai

hai sabab mauj-e-'nasīmī' kī ravānī kā yahī
dastaras meñ jo nahīñ mere ḳhudā merā nasīb

jab kahīñ gherā ġhamoñ kī āñdhiyoñ ne bā-ḳhudā
daldaloñ meñ le ke mujh ko gir paḌā merā nasīb

mujh se baazī le gayā phir bā-ḳhudā merā nasīb
maiñ sisaktā rah gayā hañstā rahā merā nasīb

apnā ḳhāliq ḳhud hī thā merā ḳhudā koī na thā
is jahāñ meñ mujh se pahle dūsrā koī na thā

mire ye afkār tere fikr-o-nazar kī tathīr haiñ mirī jaañ
maiñ hikmateñ tujh ko de rahā huuñ vahī ḳhudā kī kitāb vaalī

mal ḳhūn-e-jigar merā hāthoñ se hinā samjhe
maiñ aur to kyā kosūñ par tum se ḳhudā samjhe

ḳharīd sakte haiñ duniyā meñ ishrat-e-parvez
ḳhudā kī den hai sarmāya-e-ġham-e-farhād