Tags-Khuda

ab nahīñ ḳhair kisī sāhib-e-dil kī ai dost
aaj hai haath meñ talvār ḳhudā ḳhair kare

aaj bechain hai bīmār ḳhudā ḳhair kare
yaad aatā hai ruḳh-e-yār ḳhudā ḳhair kare

ham yahāñ ḳhud aa.e haiñ laayā nahīñ koī hameñ
aur ḳhudā kā ham ne apne naam par rakkhā hai naam

vahī badle hue tevar vahī kal kā va.ada
is liye ham ne tirā naam ḳhudā rakkhā hai

be-samajh naam ḳhudā kā vo liyā karte haiñ
pūchhtā huuñ to ye kahte haiñ sunā kartā huuñ

aap ko bhuul ke maiñ yād-e-ḳhudā kartā huuñ
ḳhud anā kahtā huuñ maujūd baqā kartā huuñ

maiñ samajhtā huuñ ḳhudā aap ko banda ban kar
haañ isī shaan kā 'markaz' huuñ kahā kartā huuñ

jo dil-o-īmāñ na diiñ nazr un butoñ ko dekh kar
yā-ḳhudā vo log is duniyā meñ aa.e kis liye

biich kā rasta nahīñ baaqī koī
yā ḳhudā hai yā bashar maujūd hai

ye vahm sā hotā hai mujhe dekh ke un ko
sīrat kā ḳhudā aur hai sūrat kā ḳhudā aur

hastī koī aisī bhī hai insāñ ke sivā aur
maz.hab kā ḳhudā aur hai matlab kā ḳhudā aur

shaiḳh jāgīr samajhtā hai ḳhudā.ī ko bhī
ham ḳhudā ko bhī kisī kā na samajhne vaale

tum jise yaad karo phir use kyā yaad rahe
na ḳhudā.ī kī ho parvā na ḳhudā yaad rahe

kis ne nazroñ meñ ḳhudā jaane use mal Daalā
nargis aaj aañkh uThātī nahīñ bīmārī se

mutma.in ho ke marne kā sāmān kar
zindagī ai ḳhudā mujh pe āsān kar

mahtāb fazā ke aa.ine meñ
dekhā thā ḳhudā ke aa.ine meñ

farz barsoñ kī ibādat kā adā ho jaise
but ko yuuñ puuj rahe haiñ ki ḳhudā ho jaise

tirā shefta huuñ mirī tujh meñ hai jaañ tah-e-teġh na kar mujhe jān-e-jahāñ
mirā ġhusse meñ aa ke miTā na nishāñ tujhe jāh-o-jalāl-e-ḳhudā kī qasam

ye duā hai qafas meñ barā-e-chaman ki guloñ se ḳhudā na chhuḌā.e chaman
mujhe rakhtī hai zinda havā-e-chaman gul-o-ġhuncha-o-bād-e-sabā kī qasam

lab-e-gor agarche judā.ī meñ huuñ magar ā.ina-e-dil kī safā.ī meñ huuñ
tirā mahv ḳhudā kī ḳhudā.ī meñ huuñ mujhe apne hī ishq-o-vafā kī qasam