Tags-Khuda

lab-e-gor agarche judā.ī meñ huuñ magar ā.ina-e-dil kī safā.ī meñ huuñ
tirā mahv ḳhudā kī ḳhudā.ī meñ huuñ mujhe apne hī ishq-o-vafā kī qasam

tire vāste jaan pe kheleñge ham ye samā.ī hai dil meñ ḳhudā kī qasam
rah-e-ishq se ab na haTeñge qadam hameñ apne hī sidq-o-safā kī qasam

in butoñ kī hī mohabbat se ḳhudā miltā hai
kāfiroñ ko jo na chāhe vo musalmān nahīñ

lī jaan ḳhudā ne kisī but ne na kiyā qatl
niklā na dam-e-marg bhī armān hamārā

ḳhudā-ma.alūm kis kī chāñd se tasvīr miTTī kī
jo goristāñ meñ hasrat hai garebāñ-gīr miTTī kī

dil but-kada rahā to tū pahlū-nashīn thā
ka.aba banā tū terī jagah pe ḳhudā hai aaj

bahut qarīb the jalve unheñ na pahchāne
kahāñ gayā thā shu.ūr-e-nazar ḳhudā jaane

na zamīñ chāhte haiñ aur na zar chāhte haiñ
ham faqīrān-e-ḳhudā ek hī dar chāhte haiñ

ḳhatā.eñ ho ga.iiñ ma.adūm haj se ai 'parvīñ'
gavāh ḳhud hai ḳhudā merī be-gunāhī kā

yuuñ ḳhudā kī ḳhudā.ī bar-haq hai
par 'asar' kī hameñ to aas nahīñ

azīzān-e-vatan ko ġhuncha o barg o samar jaanā
ḳhudā ko bāġhbāñ aur qaum ko ham ne shajar jaanā

nāḳhudā bhī tumhīñ ḳhudā bhī tum
ab vo hotā hai yā nahīñ hotā

habs kī rut meñ koī taaza havā kā jhoñkā
bād-o-bārāñ ke ḳhudā mere bhī ghar se guzre

tum aa ga.e ho ḳhudā kā subūt hai ye bhī
qasam ḳhudā kī abhī maiñ ne tum ko sochā thā

mirā zamīr bahut hai mujhe sazā ke liye
tū dost hai to nasīhat na kar ḳhudā ke liye

ġharīq-e-bahr-e-sitam umr kī huī kashtī
bahut sā ham ne pukārā pa nā-ḳhudā na milā

mujh ko hairat hai shab-e-aish kī kotāhī par
yā ḳhudā aa.e the kyā shām-o-sahar donoñ saath

kare ḳhudā se gila kyuuñ kisī kī majbūrī
kisī ke dil pe sahī iḳhtiyār de to diyā

har ḳhudā jannatoñ meñ hai mahdūd
koī sansār tak nahīñ pahuñchā

masjid kī sīḌhiyoñ pe gadāgar ḳhudā kā naam
masjid ke bām-o-dar pe amiir o kabīr maiñ