Tags-Khuda

merā jī jaane hai yā merā ḳhudā jaane hai
kyā sunā hai tire is shahr meñ kyā dekhā hai

nahīñ hai jis meñ terā ishq vo dil hai tabāhī meñ
vo kashtī Duub jā.egī na jis meñ nā-ḳhudā hogā

rāz-e-sar-basta mohabbat ke zabāñ tak pahuñche
baat baḌh kar ye ḳhudā jaane kahāñ tak pahuñche

farishte dam-ba-ḳhud ḳhā.if sarāsīma fazā thī
Hujūm-e-gumrahāñ thā aur ḳhudā kā sāmnā thā

kī ḳhitābat ko gar ḳhudā samjhā
banda bhī āḳhir aadmī hī to hai

us nā-ḳhudā ke zulm o sitam haa.e kyā karūñ
kashtī mirī Duboī hai sāhil ke ās-pās

kal ye tāb-o-tavāñ na rahegī ThanDā ho jā.egā lahū
nām-e-ḳhudā ho javān abhī kuchh kar guzro to behtar hai

fitrat meñ aadmī kī hai mub.ham sā ek ḳhauf
us ḳhauf kā kisī ne ḳhudā naam rakh diyā

apnī taqdīr se Takrā.ūñ badal Dālūñ ise
itnī taufīq kabhī mere ḳhudā de mujh ko

ziist ḳhudā jaane hai kyā shai bhuuk tajassus ashk farār
phuul se bachche zohra-jabīneñ mard mujassam bāġh-o-bahār

zulmat ko ziyā sarsar ko sabā bande ko ḳhudā kyā likhnā
patthar ko guhar dīvār ko dar kargas ko humā kyā likhnā

ḳhudā ne ye karishma chāhatoñ ko sauñp rakkhā hai
maiñ ik pal meñ tirī tauqīr ho jā.ūñ ijāzat hai

shāyad apnā ḳhudā tarāsh liyā
ab kahāñ hai vo bandagī apnī

maut ne kar diyā lāchār vagarna insāñ
hai vo ḳhud-bīñ ki ḳhudā kā bhī na qaa.il hotā

bahut hasīñ hai ye duniyā magar zavāl ke saath
ḳhudā se hashr meñ husn-e-zavāl pūchhūñgā

hai qādir to ḳhudā lekin butāñ bhī
vo kar chukte haiñ jo kuchh Thānte haiñ

'shu.ūr' tum ne ḳhudā jaane kyā kiyā hogā
zarā sī baat ke afsāne thoḌī hote haiñ

jab ḳhudā bhī nahīñ thā saath mare
mujh pe biitī hai aisī tanhā.ī

ajab ahvāl dekhā is zamāne ke amīroñ kā
na un ko Dar ḳhudā kā aur na un ko ḳhauf pīroñ kā

qafas meñ pheñk ham ko phir vahīñ sayyād jaatā hai
ḳhudā hāfiz hai gulshan meñ hamāre ham-safīroñ kā