Tags-Khuda

ḳhudā karegā samundar meñ rahnumā.ī bhī
ye naav baaqī rahe bādbāñ rahe na rahe

husn aur ishq ke nairañg ḳhudā hī jaane
sham.a jaltī hai ki dil jaltā hai parvāne kā

āshiyāne kā ḳhudā hī hāfiz
ghaat meñ tez havā baiThī hai

har ek baat kā merī ḳhudā rahegā gavāh
har ik janam kī hai ye ik janam kī baat nahīñ

adā.eñ tum ko baḳhshīñ ham ko āñkheñ
karegā aur bandoñ se ḳhudā kyā

mirī ġhairat-e-hama-gīr ne mujhe tere dar se uThā diyā
kuchh anā kā zor jo kam huā to ḳhabar huī tū ḳhudā sā hai

na puure hue bā-ḳhudā bechte haiñ
yuuñ ḳhvāb-o-ḳhayāloñ ko jā bechte haiñ

vo az-ḳhud hī nādim hue jā rahe haiñ
ḳhudā jaane kyā kyā ḳhayāl aa rahe haiñ

kyā huā kahiye jo us but ko ḳhudā
log bandoñ ko ḳhudā kahte haiñ

maqām-e-zāt kyā hai lan-tarānī kis ko kahte haiñ
ḳhudā hī jāntā hai dīd-bānī kis ko kahte haiñ

'qadr' ko tū ne dī hai jab izzat
ai ḳhudā us ko be-vaqār na kar

mire ḳhudā yahī masrūfiyat bahut hai mujhe
tire charāġh jalātā bujhātā rahtā huuñ

jab se us ne kahā ḳhudā-hāfiz
tab se sab kuchh dhuāñ dhuāñ sā hai

ḳhudā ke vāste ab to safar tamām karo
ki ab qafas se bhī to uñgliyāñ nikal aa.iiñ

ḳhudā-shanās bahut ham bhī the magar ab ke
vo maar dil pe paḌī hai ḳhudā ko bhuul ga.e

aadam kī duā hogī ye maqbūl sunā thā
phir pesh-e-ḳhudā kis kī navā kaañp rahī hai

nafas nafas meñ koī āshkār hotā hai
jo mere dil ke qarīñ hai mirā ḳhudā hogā

mauqūf hai dīdār faqat zauq-e-nazar par
aksar ke liye tuur ke sho.aloñ meñ ḳhudā thā

DhūñDhtā phirtā huuñ us ko jā-ba-jā
dil ḳhudā jaane kidhar jaatā rahā

duā.eñ miTTī meñ gir paḌī haiñ
ḳhudā se kaisī shikāyateñ hoñ