Tags-Rang

rañj har rañg ke jholī meñ bhare haiñ ham ne
jab bhī guzre haiñ kisī dard ke bāzār se ham

ye na pūchhe koī mausam-e-rañg kī pahlī pahlī adāvat ne kyā dukh diye
phuul kī aag par shab guzārī ga.ī ḳhaar kī nok par din guzārā gayā

vo hī sad-rañg hai jazīra-numā
mere ḳhvāboñ kī kyuuñ rihā.ī kī

duniyā to duniyā hī Thahrī rañg badaltī rahtī hai
dukh to ye hai dhyān kisī kā ghaTtā baḌhtā saayā thā

jaane zabāñ kī baat thī yā rañg ruup kī
ham aap apne shahr meñ jo ajnabī rahe

lahū kī koī qīmat hī nahīñ hai
tire rañg-e-hinā kā ḳhuuñ bahā kyā

yaqīñ hai 'shād' mujh ko kulliyāt-e-nazm-e-fitrat se
guloñ ne rañg-o-nik.hat ke bahut mazmūñ churā.e haiñ

damaktā hai jabīn-e-nāz par rañg-e-pashemānī
ab un se kyā kahā jaa.e ki ye sadme uThā.e haiñ

apnī thoḌī sī dhanak de bhī de
raat rañg-rez huā chāhtī hai

zindagānī ke ka.ī rañg dikhāte haiñ ye
kyā kahūñ kyā haiñ ye palkoñ pe Thaharte aañsū

tire ḳhayāl kī ḳhushbū tire jamāl kā rañg
har ik ko takmila-e-rañg-o-bū samajhte haiñ

ḳhauf kī devī ko āḳhir mil gayā us kā pata
us ke sheroñ se bhī ab rañg-e-taġhazzul jā.egā

āsmāñ kā rañg merī zaat meñ ghul jā.egā
dekhnā ik din ġhubār-e-jism bhī dhul jā.egā

kamī kamī sī thī kuchh rañg-o-bū-e-gulshan meñ
lab-e-bahār se niklī huī duā tum ho

har haqīqat ḳhud apnī ḳhabar ho ga.ī
bid.at-e-rañg sarf-e-nazar ho ga.ī

bikhar ke phuul fazāoñ meñ baas chhoḌ gayā
tamām rañg yahīñ ās-pās chhoḌ gayā

qasam de kar unheñ ye pūchh lo tum rañg-Dhañg us ke
tumhārī bazm meñ kuchh dost bhī dushman ke baiThe haiñ

ye uThnā baiThnā mahfil meñ un kā rañg lā.egā
qayāmat ban ke uTTheñge bhabūkā ban ke baiThe haiñ

surḳh hāthoñ kī haqīqat to hamī jānte haiñ
jo nahīñ jānte vo rañg-e-hinā kahte haiñ

shoḳh the rañg har ik daur meñ afsānoñ ke
dil dhaḌakte hī rahe aas meñ insānoñ ke