Tags-Rang

hargiz fareb-e-rañg-e-masarrat na khā.iye
ye ġham kā naam hai ye haqīqī ḳhushī nahīñ

rañg aur ḳhushbū se dhundlā.e rastoñ meñ
havā kī uñglī thaam ke chaltā rahtā huuñ

nazroñ ne kis kī chaak kiye parda-hā-e-rañg
sañvlā diyā hai jis ne ruḳh-e-yār kaun hai

lā.eñgī rañg lā.eñgī aa.heñ mirī rā.egāñ hī na jā.eñgī aa.heñ mirī
merī qismat to sañvre na sañvre magar zulf to us parī kī sañvar jā.egī

vo sarḳhushī de ki zindagī ko shabāb se bahara-yāb kar de
mire ḳhayāloñ meñ rañg bhar de mire lahū ko sharāb kar de

ḳhabar nahīñ thī ki yuuñ us meñ Duub jā.eñge
hamāre chehre pe rañg-e-malāl hai us kā

vo husn hai kuchh husn ke āzār se baḌh kar
vo rañg hai kuchh apnī nishānī se ziyāda

pas-e-tasvīr ho jab ek rañg-e-ātish-o-āhan
tirī tasvīr ai duniyā zarā achchhī nahīñ lagtī

merī āñkhoñ meñ har ik rañg thā tanhā.ī kā
ik ḳhalā bhī mirī tasvīr meñ rakkhā gayā thā

bhar ke saaqī ne diyā jām-e-sharāb-e-arġhavāñ
'shād' ke chehre pe rañg-e-shādmānī phir gayā

bul-havas kā muñh ho kaalā kaan meñ kyā kah diyā
aap ke chehre pe rañg-e-arġhavānī phir gayā

kitnī be-rañg thī duniyā mire ḳhvāboñ kī 'jamīl'
us ko dekhā hai to āñkhoñ meñ ujālā huā hai

mujh rañg-zard uupar ġhusse señ laal mat ho
ai sabz shaal vaale uude rumāl vaale

kal ham ek rañg-birañgī kashtī the
aur aaj samundar kī tah meñ

ābshār ke rañg to dekhe lagan manDal kyuuñ yaad nahīñ
kis kā byaah rachā hai dekho Dholak hai shahnā.ī hai

apnā rañg bhalā lagtā hai kaliyāñ chaTkīñ phuul banīñ
phuul phuul ye jhuum ke bolā kaliyo tum ko badhā.ī hai

yaad aa jaatī hai ḳhud apnī nikhartī tauba
jaam meñ jab mai-e-ḳhush-rañg bharī hotī hai

rañg aur ruup meñ sone se kharī hotī hai
dil kī vo rag jo mohabbat se bharī hotī hai

dekh kar rañg bahāroñ ke mujhe lagtā hai
jaise chunarī kisī doshīza ne phailā.ī ho

mujh ko gul-rañg bahāroñ se yahī lagtā hai
jaise parvā tirī ḳhushbū ko liye aa.ī ho