Tags-Shaam

shām-e-vīrāñ kī udāsī shab-e-tīra kā sukūt
dil-e-mahzūñ ko mile hamdam o mahram kyā kyā

rañg barsātī vahī sub.h vahī bhīgtī shaam
vahī ehsās meñ Duube hue saa.e dekhe

dil ke nazdīk sar-e-shām-e-alam ai 'nayyar'
zaḳhm ke chāñd chamak uThte haiñ tanvīr ke saath

yuuñ udāsī meñ na tū is ko guzār
umr bhar is shaam ko pachhtā.egā

maiñ huuñ ek shā.ir-e-be-navā mujhe kaun chāhe mire sivā
maiñ amīr-e-shām-o-ajam nahīñ maiñ kabīr-e-kūfa-o-rai nahīñ

phir yaad aa ga.ī hai tire āñsuoñ kī shaam
phir aaj zer-e-āb koī shahr utar gayā

yahī malāl mujhe sub.h-o-shām lāhaq hai
mire sabāt se kaise mukar ga.e mire din

palkoñ pe jugnuoñ kā baserā hai vaqt-e-shām
'anjum' maiñ pāniyoñ meñ chamak chhoḌ kar gayā

ho kisī kā mujh pe ehsāñ ye nahīñ pasand mujh ko
tirī sub.h kī tajallī mirī shaam tak na pahuñche

mirī sub.h-e-ġham balā se kabhī shaam tak na pahuñche
mujhe Dar ye hai burā.ī tire naam tak na pahuñche

sunā hai sab bhulā baiThe 'adīl'-e-dil-shikasta ko
na jaane aa rahī haiñ shaam se kyuuñ hichkiyāñ mujh ko

raḳhna-e-zar-talabāñ sarzanish-e-tīra-shabāñ
aise qisse to yahāñ shaam o sahar hote haiñ

shaam kuchh achchhā nazar aatā hai bastī kā samāñ
sub.h hotī hai to hālāt digar hote haiñ

baal ruḳhsāroñ se jab us ne haTā.e to khulā
do farañgī sair ko nikle haiñ mulk-e-shām se

maiñ tamām din kā thakā huā tū tamām shab kā jagā huā
zarā Thahar jā isī moḌ par tere saath shaam guzār luuñ

phir shaam hī se kyuuñ vo chale the chhuḌā ke haath
dukhtī rahī jo un kī kalā.ī tamām shab

tārīk hue jaate haiñ baḌhte hue saa.e
'aḳhtar' se kaho shaam huī aap bhī ghar jaa.eñ

lekin ab to ik udāsī chhā ga.ī hai
soch kī shaam aa ga.ī hai

mujhī meñ jiitā hai sūraj tamām hone tak
maiñ apne jism meñ aatā huuñ shaam hone tak

chhoḌ ai raunaq-e-bāzār mirā dāman-e-dil
shaam āñgan meñ utar aa.ī hai ghar jā.ūñgā