Tags-Shaam

terī dastak thī ki sannāTā vahī har shaam kā
rahrav-e-koh-e-nidā haiñ ghar ke bām-o-dar meñ ham

shaam Duubī paḌ rahe sūraj ke dar par shab kī shab
sub.h bikhrī chal paḌe ḳhud ko liye Thokar meñ ham

bichhaḌ ga.e the sar-e-shām hī jo ham se 'karam'
ham un sitāroñ ko shab-bhar talāsh karte rahe

jo shab-e-siyāh se Dar ga.e kisī shaam hī meñ bhaTak ga.e
vahī tājdār-e-sahar bane jo siyāhiyoñ meñ chamak ga.e

phir shaam ko aa.e to kahā sub.h ko yūñhī
rahtā hai sadā aap par ilzām hamārā

gar vaqt-e-sahar jā.iye hotā hai ye irshād
hai vaqt-e-mulāqāt sar-e-shām hamārā

kahīñ sub.h hai kahīñ shaam hai mujhe ḳhud bhī apnā patā nahīñ
mirā kyā surāġh mile tumheñ abhī be-dayār-o-qayām huuñ

mire naqsh-e-pā na miTe agar to chamak uTheñge ye rāste
mire qāfile ko ḳhabar karo maiñ harīf-e-zulmat-e-shām huuñ

mujh ko pahuñchā hī jaano apne paas
āj-kal shaam yā sahar pahuñchā

ḳhuun hotā hai sahar tak mire armānoñ kā
shām-e-vāda jo vo pāband-e-hinā hotā hai

vo shaam
jab saḌkeñ gul-e-surḳh se bharī huiiñ thiiñ

parinde āshiyānoñ se panāheñ māñgā karte haiñ
badalne lagtā hai āñkhoñ kā manzar shaam hote hī

ujāle meñ kisī sūrat safar to kaT hī jaatā hai
miyāñ 'rāshid' magar lagtī hai Thokar shaam hote hī

taḌap uThtā huuñ yādoñ se lipaT kar shaam hote hī
mujhe Dastā hai merā sard bistar shaam hote hī

na jaane in dinoñ ḳhāmosh sā rahtā hai kyuuñ din meñ
ubal paḌtā hai jazboñ kā samundar shaam hote hī

ḳhudāyā ḳhair āḳhir kaun sī bastī meñ aa pahuñchā
paḌosī pheñkne lagte haiñ patthar shaam hote hī

maiñ būḌhā ho chalā huuñ phir bhī maañ tākīd kartī hai
mire beTe na jaanā ghar se bāhar shaam hote hī

har ik lamha na.ī yalġhār kā ḳhatra satātā hai
muḳhālif samt se aate haiñ lashkar shaam hote hī

huī phir shaam phir din bhar kī shorish
galī-kūchoñ meñ chhap kar so ga.ī hai

kisī ne sub.h sañvārī kisī ne shaam apnī
mirī nazar ke ujāle sabhoñ ke kaam aa.e