Tags-Shaam

ruktā hī nahīñ tujh pe nigāhoñ kā tasalsul
kal shaam tire haath meñ kañgan bhī nayā thā

shaam kī bhīgī huī palkoñ meñ phir
koī aañsū aa.e aur taarā bane

dil-e-tabāh ko ab tak nahīñ yaqīñ aayā
ki shaam biit ga.ī aur tū nahīñ aayā

kin kin musībatoñ se huī sub.h shām-e-hijr
so zulfeñ hī banāte use raat ho ga.ī

yuuñ hirāsāñ haiñ musāfir bastiyoñ ke darmiyāñ
ho ga.ī ho shaam jaise jañgaloñ ke darmiyāñ

koī zahr-e-ġham piye tā-ba-kai huī sarf-e-sāġhar-e-ġhair mai
na vo joshish-e-sar-e-shām hai na vo va.ada-e-shab-e-māh hai

tire hijr meñ mah-e-sīm-bar koī ġhaur se jo kare nazar
mirī sub.h shaam se hai batar mirā roz shab se siyāh hai

kyā unheñ andoh-e-hañgām-e-sahar yaad aa gayā
shaam hī se bazm meñ sham.eñ jo giryāñ ho ga.iiñ

sāhibo mujh ko abhī raqs nahīñ aatā hai
jhuum letā huuñ faqat shaam ke āsār ke saath

ajab tilism sā manzar hai bhīgtī huī shaam
koī parī hai dhanak kī kamān thāme hue

dil jalā kar vādi-e-ġhurbat ko raushan kar chale
ḳhuub sūjhī jalva-e-shām-e-ġharībāñ dekh kar

maza to jab hai udāsī kī shaam ho 'shāhīñ'
aur us ke biich se shām-e-tarab nikal aa.e

sub.h-e-shādābi-e-jāñ kā kyuuñ hai malāl
ishrat-e-shām-e-ġham kis ke hone se hai

dhīre dhīre bahne vaalī
ek salonī shaam ajab thī

ai 'farāz' aise meñ barsāt kaTegī kyūñkar
gar yūñhī shām-o-sahar rone ke aadī ro.e

ye aamad āmad-e-tūfān-e-shab ḳhudā kī panāh
tuyūr-e-shām simaT jaa.eñ āshiyānoñ meñ

aaj to shaam hī se ā.ankhoñ meñ niiñd ne ḳheme gaaḌ diye
ham to din nikle tak terā rasta dekhne vaale the

sannāTe kā aalam qabr meñ hai hai ḳhvāb-e-adam ārām nahīñ
imkān-e-numūd-e-sub.h nahīñ ummīd-e-charāġh-e-shām nahīñ

kyuuñ tīrgī-e-tāl.e kuchh tū bhī nahīñ kartī
ye roz-e-musībat kā kyuuñ shaam nahīñ hotā

parbatoñ ke peḌoñ par shaam kā baserā hai
surma.ī ujālā hai champa.ī añdherā hai