Tags-Shaam

'shu.ūr' aap aa.e haiñ milne sar-e-shām
hamāre paas hotī to pilāte

shaam kajlā.ī huī raat abhāgan jaisī
rut nahīñ aatī kisī gaañv meñ sāvan jaisī

siyāh hai dil-e-gītī siyāh-tar ho jaa.e
ḳhudā kare ki har ik shaam be-sahar ho jaa.e

laveñ charāġhoñ kī āñkhoñ meñ gum huiiñ shāyad
kahīñ se raushnī laa.eñ to fikr-e-shām kareñ

bujhe charāġhoñ meñ kaise ho nuur kī tarsīl
na ho ye fikr to phir intizār-e-shām kareñ

kisī ke zulf ne barham kiye haiñ hosh-o-havās
luTā hai shaam ke raste meñ qāfila dil kā

dil ik udaas sub.h nazar ik udaas shaam
kaise kaheñ ki dost kī mahfil se aa.e haiñ

sukūt-e-shab toḌne kī ḳhātir bhī koī hañgāma saath rakhnā
na shaam hote hī har tamannā ko qaid-ḳhāne maiñ Daal denā

kis mashaqqat se mujhe jism uThānā paḌā hai
shaam hote hī tire shahr se jaanā paḌā hai

suno ye shaam ab Dhalne lagī hai
batā do jo tumhārā faisla hai

shaam aa.ī sehn-e-jāñ meñ ḳhauf kā bistar lagā
mujh ko apnī ruuh kī vīrāniyoñ se Dar lagā

ab nahīñ koī yahāñ hausla dene vaalā
phir vahī dasht vahī shām-e-safar sāmne hai

vāda-e-nā-tamām ne maarā
roz kī sub.h o shaam ne maarā

shaam se aa ga.e jo piine par
sub.h tak āftāb haiñ ham log

huā hī chāhtī hai shaam bhī ab sub.h piirī kī
magar ab tak to hai pahlū meñ 'qaisar' dil javāñ apnā

vo roz shaam ko 'alvī' idhar se jaatī hai
to kyā maiñ aaj use apne ghar bulā dekhūñ

tumhāre shahr kā mausam baḌā suhānā lage
maiñ ek shaam churā luuñ agar burā na lage

vo be-tābī mirī har shaam ke mastūr hone tak
tumhārā baam par aanā añdherā nuur hone tak

parinde hote to Daalī pe lauT bhī jaate
hameñ na yaad dilāo ki shaam ho ga.ī hai

jaltā hai ki ḳhurshīd kī ik roTī ho tayyār
le shaam se tā-sub.h tanūr-e-shab-e-mahtāb