Tags-Shaam

duniyā se dāġh-e-zulf-e-siyah-fām le gayā
maiñ gor meñ charāġh-e-sar-e-shām le gayā

kisī sub.h ḳhvāhish-e-marg se bhī numūd paatī hai zindagī
kisī shaam apne vajūd par bhī gumān hotā hai qabr kā

mile mujhe bhī agar koī shaam fursat kī
maiñ kyā huuñ kaun huuñ sochūñgā apne baare meñ

sitāre mish.aleñ le kar mujhe bhī DhūñDne nikleñ
maiñ rasta bhuul jā.ūñ jañgaloñ meñ shaam ho jaa.e

zindagī vaqt kī dīvāroñ meñ mahbūs rahī
koī parda na uThā shām-o-sahar se aage

Thahrī jo vasl kī to huī sub.h shaam se
but mehrbāñ hue to ḳhudā mehrbāñ na thā

shaam ke saa.e lapakte chale aate haiñ so ab
jo bhī kuchh hai vo hai girtī huī dīvār ai dil

phir ye fursat hameñ mile na mile
phir ye rañgīn shaam ho ki na ho

havā-e-sub.h-e-dil-āzār itnī tez na chal
charāġh-e-shām-e-ġharībāñ haiñ ham bujhā na hameñ

shaam itnī kabhī udaas na thī
kyuuñ tirī zulf meñ gulāb nahīñ

mauqūf hai laboñ kī tabassum se rasm-o-rāh
āh-o-fuġhāñ vazīfa-e-shām-o-sahar hai aaj

rafta rafta shaam ke nā-mehrbāñ sailāb meñ
Dūbtā sā ujle ujle se paroñ ke saath maiñ

kaTe jo tīrgi-e-shām-e-ġham to kaise 'shamīm'
ḳhafā ḳhafā sī kisī ke ḳhayāl kī zau hai

ye mulāqāt ye sukūt ye shaam
ibtidā meñ ye intihā sī kyuuñ

bhāgte sūraj ko pīchhe chhoḌ kar jā.eñge ham
shaam ke hote hī vāpas apne ghar jā.eñge ham

vo shām-e-ġham jo guzārī ham ne koī guzāre to jaan paa.e
kaThin hai kitnā hai kaisā mushkil uThā ke maazī meñ haal rakhnā

kal shaam mere qatl kī tārīḳh thī magar
dushman kā intizār bahut der tak rahā

mujhe milne aa.egā shaam ko mirā ham-suḳhan
mirā ā.īna mujhe aaj hī nahīñ mil rahā

dekho to pech-o-tāb kī sūrat ki mil ga.ī
shām-e-firāq bhī tirī zulf-e-dotā ke saath