Tags-Shaam

gul huā āḳhir bhaḌak kar sho.ala-e-josh-e-shabāb
thī kaf-e-mauj-e-havādis aur charāġh-e-shām thā

kabhī tasavvur meñ aa.e bhī to ghanerī zulfoñ ko ruḳh pe Daale
hamārī qismat meñ shām-e-ġham thī numūd-e-nūr-e-sahar se pahle

jo tīra-shabī ne chhoḌā mujhe to dil se mire uThī ye sadā
ujāle zarā ḳhayāl rahe sahar kabhī shaam ho na sake

ai shaam mehrbāñ ho
ai shām-e-shahryārāñ

shaam apne tilismāt meñ jakḌī huī aa.ī
chāñd apne ḳhayālāt meñ Duubā huā niklā

shaam tanhā.ī dhuāñ uThtā barābar dekhte
phir sar-e-shab chāñd ubharne kā bhī manzar dekhte

thī yuuñ to shām-e-hijr magar pichhlī raat ko
vo dard uThā 'firāq' ki maiñ muskurā diyā

palaT ke daur-e-zamāñ sub.h-o-shām paidā kar
na.e tarīq se duniyā meñ naam paidā kar

mai-e-tuhūr kā is vaqt le na naam ai shaiḳh
ye vaqt-e-shām to añgūr kī sharāb kā hai

na tū ne mai chakhī zāhid na jurm-e-ishq kiyā
to sub.h o shaam tujhe fikr kis azaab kā hai

ye kahāñ se mauj-e-tarab uThī ki malāl dil se nikal ga.e
vahī sub.h-o-shām jo the garāñ nafas-e-bahār meñ Dhal ga.e

tum saath ho to dhuup kā ehsās tak nahīñ
ye dopahar to shaam se aage nikal ga.ī

mehrāb-e-ḳhush-qayām se aage nikal ga.ī
ḳhushbū diye kī shaam se aage nikal ga.ī

ye umr musībat kī basar ho ke rahegī
jab shaam huī hai to sahar ho ke rahegī

ye hayā-ālūd shaam
khiḌkiyoñ se khiḌkiyoñ tak jhilmilātī jā rahī hai

shabāb-e-dard mirī zindagī kī sub.h sahī
piyūñ sharāb yahāñ tak ki shaam ho jaa.e

shaam ko Dūbte sūraj kī chamaktī surḳhī
duur tak phail ga.ī ḳhūnī jazīroñ kī tarah

apne hī aks ko paanī meñ kahāñ tak dekhūñ
hijr kī shaam hai koī to lab-e-jū aa.e

vo be-hisī thī ḳhushk huā sabza-e-umīd
barse jo sub.h-o-shām-o-chāhat nahīñ milī

maza to jab hai udāsī kī shaam ho 'shāhīñ'
aur us ke biich se shām-e-tarab nikal aa.e