Tags-Sukoon

agar sukūn se umr-e-azīz khonā ho
kisī kī chaah meñ ḳhud ko tabāh kar liije

māñgne par kyā na degā tāqat-e-sabr-o-sukūn
jis ne be māñge atā kar dī pareshānī mujhe

maiñ pur-sukūn rahūñ jhiil kī tarah yaanī
kisī ḳhayāl kisī ḳhāmushī meñ bikhre hue

charāġh-e-āḳhir-e-shab huuñ magar abhī sūraj
sukūn se tū nikalnā ki jal rahā huuñ maiñ

sukūn-o-rāhat-e-jāñ ab kahīñ nahīñ mumkin
tumhāre dil ko hī ab mustaqar banāyā jaa.e

kis qadar gunāhoñ ke murtakib hue haiñ ham
jo sukūn luTtā hai baar baar is ghar kā

hamāre saath duā.eñ bahut thiiñ apnoñ kī
kabhī sukūn se guzrā magar na saal koī

aayā mare qarīb gul-e-sīm-tan kī tarah
saarā sukūn sūrat-e-sīmāb le gayā

milegā sab ko apnā haq raheñge sab sukūn se
magar vo saare va.ade sabz baaġh ban ke rah ga.e

sukūn-e-dil baḌī daulat sahī ai ham-nashīñ lekin
sukūñ pā kar bhī akasr muztarib rahnā paḌā mujh ko

hai talāsh-e-vus.at-e-lā-makāñ ki jahāñ pe kuchh ho sukūn-e-dil
ho jahāñ bhī bandish-e-āb-o-gul mujhe us makāñ se gurez hai

kahāñ vo zaat ki jis ko sukūn miltā thā
tamām rāhateñ ham par nisār karte hue

chehre pe chamak āñkhoñ meñ hayā lab garm ḳhunuk chhab narm navā
jinheñ itne sukūn meñ dekhā thā vahī aaj mile ghabrā.e hue

harīr-o-resham-o-dībā meñ rañg-e-nāz-o-adā
sukūn-e-dil ke liye haiñ qarār-e-jāñ kī tarah

tasavvur meñ koī aayā sukūn-e-qalb-o-jāñ ho kar
mohabbat muskurātī hai bahār-e-jāvedāñ ho kar

sukūn-e-jism to hāsil kabhī huā hī nahīñ
maiñ jī rahā huuñ tirī qurbatoñ ke ḳhvāb liye

na thā na hogā kabhī mayassar sukūn jo tere qurb meñ hai
ye vaqt kī jhiil jis meñ har lahr jaise thak kar Thahar ga.ī hai

mizāj-e-shauq meñ māmūriyat kā azm bhī ho
faqat sukūn nahīñ zindagī meñ razm bhī ho

kis liye chhīn liyā to ne ġhazāloñ kā sukūn
is ḳharābe ke liye kyā mirī vahshat kam thī

na sukūn-e-dil na qarār-e-jāñ na qayām-e-sabr koī zamāñ
ye sarishk-e-ġham kā hai kārvāñ ki yūñhī hamesha ravāñ rahā