Tags-Waiz

zikr-e-sharāb-e-nāb pe vaa.iz ukhaḌ gayā
bole the achchhī baat bhale aadmī se ham

ḳhud mil ga.e us but se mujhe kar ke nasīhat
vaa.iz bhī ḳhudā hī ke sañvāre nikal aa.e

maiñ kahāñ vaa.iz kahāñ tauba karo
jo na samjhā ḳhud vo kyā samjhā.egā

tumhārā va.az rāz-e-ishq kyā kholegā ai vaa.iz
zabāñ kī ye nahīñ hazrat ye chashm-o-dil kī bāteñ haiñ

hai to vaa.iz ḳhudā-parast magar
lab pe zikr-e-butāñ ziyāda hai

ham ko vaa.iz kā bhī dil rakhnā hai saaqī kā bhī dil
ham to tauba kar ke bhī pāband-e-maiḳhana rahe

bahut saudā rahā vaa.iz tujhe nār-e-jahannam kā
maza soz-e-mohabbat kā bhī kuchh ai be-ḳhabar jaanā

riñd vaa.iz se kyuuñ ki sarbar ho
us kī chhū, kī kitāb aur hī hai

bañg hī de jo mai nahīñ vaa.iz
terī ūñchī dukān par kuchh hai

vaa.iz se sun ke qāmat-e-tauba kī ḳhūbiyāñ
dauḌā ḳhayāl ik qad-e-āzād kī taraf

vā.iz-e-sāda-lauh se kah do chhoḌe uqbā kī bāteñ
is duniyā meñ kyā rakkhā hai is duniyā meñ kyā hogā

javānī ko bachā sakte to haiñ har daaġh se vaa.iz
magar aisī javānī ko javānī kaun kahtā hai

tajallī to huī muusā ko par merī tarah vaa.iz
hamesha jalva-gar har ik shajar hotā to kyā hotā

ai falak kuchh to asar husn-e-amal meñ hotā
shīsha ik roz to vaa.iz ke baġhal meñ hotā

ḳhuld mai-ḳhāne ko kahte haiñ ba-qaul-e-vā.iz
kaaba but-ḳhāne ko kahte haiñ jo vīrāñ ho jaa.e

vaa.iz hai ḳharāb ḳhvāhish-e-ḳhuld
bilkul ye shaḳhs jannatī hai

sar-e-mimbar hai vaa.iz mo'tariz kyoñ but-parastī par
yahāñ lāzim nahīñ mard-e-ḳhudā zikr-e-butāñ karnā

ye bahs kasrat o vahdat kī ham se kyuuñ vaa.iz
hamārī āñkhoñ se tū dekh chār-sū kyā hai

shirk hai shirk ye ai vā.iz-e-āshufta-ḳhayāl
ġham-e-uqbā ko sharīk-e-ġham-e-duniyā bhī na kar

chaḌhī hai kachche ghaḌe kī aisī bañdhī hai ye dhun hameñ bhī saaqī
chakhā.eñ vaa.iz ko aaj ham bhī zarā mazā shahad-o-añgbīñ kā