Tags-Waiz

nām-e-mai vo hai ki lab par jo kabhī aatā hai
muñh se bāhar nikal aatī hai zabān-e-vā.iz

paa.e ḳhum baiTh ke nashshe meñ vo bāteñ kiije
log samjheñ sar-e-mimbar hai bayān-e-vā.iz

haal ma.alūm huā nār-o-jināñ kā kyūñkar
is qadar to nahīñ ūñchā hai makān-e-vā.iz

maiñ parī-zādoñ kā āshiq huuñ to vo hūroñ kā
mere saude se hai baḌh kar ḳhafqān-e-vā.iz

qulqul-e-shīsha-e-mai se tire mai-kash saaqī
sun rahe haiñ ḳhabar-e-rāz-e-nihān-e-vā.iz

apne rindoñ kī maiñ hū-haq kā huuñ sunñe vaalā
yā-ilāhī na sunānā suḳhnān-e-vā.iz

ek kāñTā sā nikal jaa.e hamāre dil se
sansiyoñ se koī khīñche jo zabān-e-vā.iz

maiñ bhī vo huuñ jo mire aage kabhī muñh khole
kaaT Dālūñ abhī dāñtoñ se zabān-e-vā.iz

misr meñ bhī na ye fir.aun kā aalam hogā
dekhe masjid meñ koī shauqat-o-shān-e-vā.iz

mai-kade vāloñ se dabne lage masjid vaale
daur saaqī kā hai guzrā vo zamān-e-vā.iz

ab kaun sune bāteñ bahke hue vaa.iz kī
chalte haiñ 'shafaq' ham to vo kaalī ghaTā aa.ī

sadāqat ho to dil sīnoñ se khiñchne lagte haiñ vaa.iz
haqīqat ḳhud ko manvā letī hai maanī nahīñ jaatī

mujhe vaa.iz apnī lagī hai dhun koī phuul ātish-e-tar kā chun
mire dard-e-dil kī hadīs sun kabhī chheḌ kar lab-e-jām se

asar ho yā na ho vaa.iz bayāñ meñ
magar chaltī to hai terī zabāñ ḳhuub

un ke fiqroñ meñ na ā.eñge ye sachche āshiq
vaa.iz aa.e haiñ jo samjhāne to samjhāne do

ek vaa.iz hai ki jis kī da.avatoñ kī dhuum hai
ek ham haiñ jis ke ghar kal mai udhār aane ko thī

terī bātoñ se aaj to vaa.iz
vo jo thī ḳhvāhish-e-najāt ga.ī

na shauq mujh ko hai hūr-e-īñ kā na pās-e-vā.iz hai apne diiñ kā
jo zikr karnā hai gar yahīñ kā sunā na jhagḌā kahīñ kahīñ kā

muñh meñ vaa.iz ke bhī bhar aatā hai paanī aksar
jab kabhī tazkira-e-jām-e-sharāb aatā hai

mar kar are vaa.iz koī zinda nahīñ hotā
vo hashr maze kā hai jo barpā nahīñ hotā