Tags-Waiz

na jā vaa.iz kī bātoñ par hamesha mai ko pī 'tābāñ'
abas Dartā hai tū dozaḳh se ik shara.ī darakkā hai

kū-e-sanam se ham ko sarokār hai faqat
vaa.iz tirī bahisht ko apnā salām hai

sāqiyā ab ke baḌe zoroñ pe haiñ ham mai-parast
chal ke vaa.iz ko sar-e-mimbar latāḌā chāhiye

matlab nikāl lā.egā vaa.iz kisī tarah
āyāt-e-bayyanāt kirā.e pe lījiye

tum isī liye bane ho ki banāo bāteñ vaa.iz
kisī kaam ke agar ho to vo kaam kar ke dekho

saaf dil saada mizāj aisī tabī.at paa.ī
ham to vaa.iz ko bhī ik banda-e-yazdāñ samjhe

hameñ to kufr kā ta.ana diyā thā vaa.iz ne
haram meñ ab koī dīñ-dār bhī nahīñ baaqī

itne ḳhā.if haiñ mai-o-mah se janāb-e-vā.iz
nām-e-kausar bhī jo sunte haiñ to Dar jaate haiñ

kyuuñ haram hī ke ho rahe vaa.iz
vus.at-e-kā.enāt kitnī hai

sharāb-e-ishq har millat meñ har maz.hab meñ jaa.ez hai
ye kyā aafat hai ai vaa.iz ravā ko nāravā karnā

bas aap ke nazdīk to ai hazrat-e-vā.iz
aayat hai baḌī chiiz rivāyat hai baḌī chiiz

kuchh mohtasiboñ kī ḳhalvat meñ kuchh vaa.iz ke ghar jaatī hai
ham bāda-kashoñ ke hisse kī ab jaam meñ kam-tar jaatī hai

vaa.iz milegī ḳhuld meñ kab is qadar sharāb
paanī ke badle piite haiñ ai be-ḳhabar sharāb

sadāqat ho to dil sīnoñ se khiñchne lagte haiñ vaa.iz
haqīqat ḳhud ko manvā letī hai maanī nahīñ jaatī

jab ki vahdat hai bā.is-e-kasrat
ek hai sab kā rāstā vaa.iz

vaa.iz kī āñkheñ khul ga.iiñ piite hī sāqiyā
ye jām-e-mai thā yā koī dariyā-e-nūr thā

ka.aba ho ki but-ḳhāna ho ai hazrat-e-vā.iz
jā.eñge jidhar aap na jā.eñge udhar ham

aa.eñ mai-ḳhāne meñ kabhī vaa.iz
huur bhī hogī aur sab hogā

maiñ bhī vo huuñ jo mire aage kabhī muñh khole
kaaT Dālūñ abhī dāñtoñ se zabān-e-vā.iz

misr meñ bhī na ye fir.aun kā aalam hogā
dekhe masjid meñ koī shauqat-o-shān-e-vā.iz