Tags-Waiz

sar jo jhukā us shoḳh ke aage aur kahīñ phir jhuk na sakā
maslak-e-mehr-o-vafā meñ vaa.iz ham kāfir bhī musalmāñ haiñ

vaa.iz tirī zabāñ se ġhībat butoñ kī sun kar
masjid se uTh ke pahuñche ham dair-e-barahman meñ

jahāñ chalā diyā sāġhar kā daur ai vaa.iz
vahīñ pe gardish-e-ayyām rok dī maiñ ne

muñh banātā hai burā kyuuñ vaqt-e-va.az
aaj vaa.iz tū ne pī achchhī nahīñ

shukriya vaa.iz jo mujh ko tark-e-mai kī dī salāh
ġhaur maiñ is par karūñgā hosh meñ aane ke ba.ad

kahāñ mai-ḳhāne kā darvāza 'ġhālib' aur kahāñ vaa.iz
par itnā jānte haiñ kal vo jaatā thā ki ham nikle

hazrat-e-vā.iz na aisā vaqt haath aa.egā phir
sab haiñ be-ḳhud tum bhī pī lo kuchh agar shīshe meñ hai

ka.aba sunsān hai kyuuñ ai vaa.iz
haath kānoñ se uThā ġhaur se sun

rindoñ ko Darā sakte haiñ kyā hazrat-e-vā.iz
jo kahte haiñ allāh se Dar kar nahīñ kahte

terī bātoñ se aaj to vaa.iz
vo jo thī ḳhvāhish-e-najāt ga.ī

ye koī baat hai ḳhum saath liye vaa.iz aa.e
aur phir maiñ na sunūñ qibla-e-hājāt kī baat

kam-baḳht ne sharāb kā zikr is qadar kiyā
vaa.iz ke muñh se aane lagī bū sharāb kī

vaa.iz kī kaḌvī bātoñ ko kab dhyān meñ apne laate haiñ
ye rind-e-balā-nosh aise haiñ sunte haiñ aur pī jaate haiñ

vaa.iz ab bhī jurm hai kyā mai-kashī
chāñdnī hai aur shab-e-ādīna hai

na mullā huuñ na muftī huuñ na vaa.iz huuñ na qaazī huuñ
gunahgār o ḳhatā-kār o razā-e-haq pe raazī huuñ

kyuuñ kufr hai dīdār-e-sanam hazrat-e-vā.iz
allāh dikhātā hai bashar dekh rahe haiñ

tirī baat kyā hai vaa.iz mirā dil vo hai ki jis ne
isī mai-kade meñ aksar mirī baat bhī na maanī

ḳhud-farāmosh hai kyā aur ko samjhā.egā
rāst-bāzoñ se kajī par hai gumān-e-vā.iz

ḳhidmat-e-rind qadah-nosh meñ ye be-adabī
jī meñ hai kāTiye dāñtoñ se zabān-e-vā.iz

ham-nafas bāġh-e-jināñ ghar hai gunahgāroñ kā
DhūñDh dozaḳh meñ kahīñ jā ke makān-e-vā.iz