Tags-Waiz

azal se rindoñ ko mai kī aadat hai aur vaa.iz kī sarzanish kī
taḳhāluf-e-vaz.a se hai jhagḌā na dostī hai na dushmanī hai

ġharaz na rakkhe mai-e-jahāñ se to ham bhī qaa.il hoñ tere vaa.iz
kamāl kyā jab ummīd-e-fardā hī illat-e-pāk-dāmanī hai

daar mil hī ga.ī mansūr ko vaa.iz varna
kaun duniyā meñ mohabbat kā sila detā hai

vahī hai apnī rindī aur vahī vaa.iz kī fahmā.ish
burī aadat koī bhī ho ba-āsānī nahīñ jaatī

jaate hai ḳhānqāh se vaa.iz salām hai
ham dair se chale sanam ab raam raam hai

muzhda-bād ai bāda-ḳhvāro daur-e-vā.iz ho chukā
madrase khole ga.e ta.amīr mai-ḳhāna huā

vaa.iz tū bāġh-e-husn kī ik baar sair kar
mumkin hai dilkashī meñ ho ḳhuld-e-barīñ sharīk

niyāz-e-be-ḳhudī behtar namāz-e-ḳhud-numā.ī siiñ
na kar ham puḳhta-maġhzoñ siiñ ḳhayāl-e-ḳhām ai vaa.iz

niyāz-e-ishq ko samjhā hai kyā ai vā.iz-e-nādān
hazāroñ ban ga.e ka.abe jabīñ maiñ ne jahāñ rakh dī

vaa.iz kahe kuchh bhī hameñ ma.alūm hai yārab
sau ḳhuld haiñ poshīda tirī ek razā meñ

mujh ko farāz-e-ishq batā vā.iz-e-azīz
ab zohd se sujūd se aage kī baat kar

kaleja terā phaT jā.egā vaa.iz fart-e-hairat se
batā duuñ maiñ agar tujh ko gunahgāroñ ne kyā paayā

kyā huā vaa.iz kare hai shor juuñ tabl-e-tahī
vo sar-e-be-maġhz goyā kāñsa-e-tambūr hai

hazrat-e-vā.iz tujhe merā pata kyūñkar mile
jism ke ka.abe meñ mānind-e-ḳhudā rahtā huuñ maiñ

zahe izzat jo ho is bazm meñ mazkūr ai vaa.iz
balā se gar gunahgāroñ meñ apnā naam aa.egā

vaa.iz ke zikr-e-mehr-e-qayāmat ko kyā kahūñ
aalam shab-e-visāl ke āñkhoñ meñ chhā ga.e

na khol vaa.iz kitāb-e-dānish ki ātish-e-ishq o āb-e-mai se
dho.ūñ jalā.ūñ tire risāle ze-āb avval do.am ba-ātish

kasī haiñ bhabtiyāñ masjid meñ rīsh-e-vā.iz par
kahīñ na merī tabī.at ḳhudā gavāh rukī

tāsīr na ho 'shād' to denā hameñ ilzām
kuchh der to sun vaa.iz hakīmāna hamārā

ilāhī kyā banegī saath mere shaiḳh-o-vā.iz ko
idhar rindī sharābī hai udhar ko pārsā.ī hai