Tags-Bahaar

bahār aa.ī hai ghuT ghuT ke jaan de bulbul
qafas meñ nik.hat-e-gul kī umīd-vār na ho

Tapak ke āñkhoñ se aa.e lahū jo dāman tak
to is bahār se behtar koī bahār na ho

Thahar Thahar dil-e-vahshī bahār aane de
abhī se bahr-e-ḳhudā itnā be-qarār na ho

ba-rañg-e-sabza-e-begāna rauñd Daale falak
mujhe bahār bhī aa.e to sāz-gār na ho

ḳhizāñ ke jaur se vāqif koī bahār na ho
kisī kā pairahan-e-husn tār-tār na ho

na ā.eñge vo 'hasrat' intizār-e-shauq meñ yūñhī
guzar jā.eñge ayyām-e-bahār āhista āhista

unheñ bhī dekh kabhī ai nigār-e-shām-e-bahār
jo ek rañg se tasvīr-e-jāñ banāte haiñ

tujhe chāhā to rañg ye miT ke jame tire baaġh meñ ḳhaak se paak hue
mare tere chaman kī havas meñ jo ham to ġhubār ko abr-e-bahār kiyā

ga.ī jaañ qafas meñ barā-e-chaman chalī le ke jahāñ se havā-e-chaman
kabhī abr-e-karam ne kiyā na karam na kisī ne bayān-e-bahār kiyā

bā.is-e-imbisāt ho āmad-e-nau-bahār kyā
rañg-e-chaman dikhā.egā sīna-e-dāġh-dār kyā

kaun duniyā se bāda-ḳhvār uThā
chashm-e-tar abr-e-nau-bahār uThā

qafas meñ dekh kar baazū asiir aapas meñ kahte haiñ
bahār-e-gul tak aa jā.eñge par āhista āhista

ruḳh-e-bahār pe aks-e-ḳhizāñ bhī kitnī der
muḳhālifat pe tulā āsmāñ bhī kitnī der

bahār aa.e to merā salām kah denā
mujhe to aaj talab kar liyā hai sahrā ne

rañg-e-gulāl muñh par aisā bahār de hai
juuñ āftāb-e-tābāñ zer-e-shafaq nihāñ hai

chhā rahā hai rañg har jānib bahār-e-husn kā
vā haiñ jin ke dīda-e-dil gul-badāmāñ ho ga.e

kuchh ḳhayāl-e-dost aayā thā ki aa pahuñchī bahār
jis taraf dekhā gulistāñ hī gulistāñ ho ga.e

surḳhī hai jo gulāb sī āñkhoñ meñ ai 'munīr'
ḳhār-e-bahār dil meñ chubhone kā rañg hai