Tags-Bahaar

na Toko dosto us kī bahār nām-e-ḳhudā
yahī ab ek hai yaañ gul-ezār nām-e-ḳhudā

bahār aa.ī hai ab aap bhī chale aa.eñ
bahār ko bhī ḳhabar ho shaguftagī kyā hai

nā-umīdī meñ jalva-e-dīdār
hai ḳhizāñ meñ bahār kī sūrat

aao ġhubār-e-rāh meñ DhūñDeñ shamīm-e-nāz
aao ḳhabar bahār kī pūchheñ ḳhizāñ se ham

ai nau-bahār-e-nāz tirī nik.hatoñ kī ḳhair
dāman jhaTak ke nikle tire gulsitāñ se ham

bahār-e-gul-kada-e-nāz dil-kushā hai magar
nasīm-e-shauq ḳhirāmāñ nahīñ to kuchh bhī nahīñ

ye aur baat ki rañg-e-bahār kam hogā
na.ī rutoñ meñ daraḳhtoñ kā baar kam hogā

jānte sab haiñ ki is ke baad hai daur-e-ḳhizāñ
kyuuñ na dāmān-e-bahār-e-zindagī ko chhoḌ de

abhī kuchh der hai sayyād bahār aane meñ
aur do roz qafas se mujhe āzād na kar

haa.e zanjīr-shikan vo kashish-e-fasl-e-bahār
aur zindāñ se nikalnā tire dīvāne kā

ḳhushī se phūleñ na ahl-e-sahrā abhī kahāñ se bahār aa.ī
abhī to pahuñchā hai ābloñ tak mirā mazāq-e-barhana-pā.ī

ḳhāmoshī-e-ḳhizāñ thī chaman-dar-chaman tamām
shāḳh-o-shajar meñ shor-e-bahār intizār thā

qafas se duur sahī mausam-e-bahār to hai
asīro aao zarā zikr-e-āshiyāñ ho jaa.e

nahīñ ho tum to har shai ajnabī ma.alūm hotī hai
bahār-e-zindagī kāñToñ bharī ma.alūm hotī hai

kuchh aur vo huā na huā mujh ko dekh kar
yād-e-bahār-e-husn se ġhamnāk to huā

rash.ha-e-shabnam bahār-e-gul faroġh-e-mehr-o-māh
vaah kyā ash.ār haiñ dīvān-e-fitrat dekhiye

rañg o bū meñ Duube rahte the havās
haa.e kyā shai thī bahār-e-ārzū

kyā ġhazab tū ne ai bahār kiyā
pattī pattī ko be-qarār kiyā

bahār aate hī Takrāne lage kyuuñ sāġhar o miinā
batā ai pīr-e-mai-ḳhāna ye mai-ḳhānoñ pe kyā guzrī

gul-hā-e-nau-bahār haiñ āñgan meñ zard zard
peḌoñ pe khil rahī hai ḳhizāñ ghar udaas hai