Tags-Bahaar

kahtā rahā huuñ dil se ki aa.egī phir bahār
is aarzū meñ haa.e zamāna guzar gayā

chaman kī samt chalā to hai kārvān-e-bahār
jo rāhzan hī hue rahnumā to kyā hogā

koī zaḳhm-ḳhurda hai ḳhaar kā koī ḳhūñ-tapīda bahār kā
hai mirā hī hausla 'mus.hafī' ki kisī se mujh ko gilā nahīñ

na nasīm-e-bāġh-o-bahār huuñ na fidā-e-rū-e-nigār huuñ
maiñ ġharīb-e-shahr-o-dayār huuñ mirī dair o ka.aba meñ jā nahīñ

kaif-e-bahār bazm-e-tarab raqs-e-jām-e-mai
kis kaam ke haiñ dil hī agar mutma.in nahīñ

bahār aa.ī guloñ ko hañsī nahīñ aa.ī
kahīñ se bū tirī guftār kī nahīñ aa.ī

jo titliyāñ nahīñ dikhā.ī deñ to fikr ho ga.ī
bahār kā chaman se ab hai chal-chalāv kyā kareñ

doshīza-e-bahār muskurā.e jaise
mauj-e-tasnīm gungunā.e jaise

afsurdagī bhī husn hai tābindagī bhī husn
ham ko ḳhizāñ ne tum ko sañvārā bahār ne

dekh kar tujh ko bhuul jā.eñge
gul khilā.enge be-bahār daraḳht

ḳhizāñ kī raat ke qātil kahāñ ga.e dekheñ
ki jo lahū hai charāġh-e-bahār kī lau hai

chaman chaman jo ye sub.h-e-bahār kī zau hai
tire tabassum-e-rañgīñ kā ek partav hai

bharī bahār meñ ye merī chāk-dāmānī
na jaane kab kā uThānā paḌā hai ḳhamyāza

ye kyā bahār hai ki dikhā.ī ga.ī mujhe
sho.aloñ kī aañch bhī gul-e-rañgīñ-qabā ke saath

mire junūñ meñ mirī vafā meñ ḳhulūs kī jab kamī milegī
chaman giraft-e-ḳhizāñ meñ hogā bahār ujḌī huī milegī

bahār laa.ī hai ab ke payām aur hī kuchh
diloñ kī baḳhiyā-girī kā zamāna aayā hai

jo merī chashm ke parde sharīk ho jaate
kamāl-e-dāman-e-abr-e-bahār baḌh jaatā

bahār bā.is-e-jam.īyat-e-chaman na huī
shamīm-e-gul kī pareshāniyoñ ke din aa.e

bahār aa.ī gul-afshāniyoñ ke din aa.e
uThāo saaz ġhazal-ḳhvāniyoñ ke din aa.e

hai bharī bahār to kyā karūñ na mile qarār to kyā karūñ
mire sāmne haiñ vo āshiyāñ jo bharī bahār meñ jal ga.e