Tags-Iltija

shanāḳht jis se zamāne meñ aadmī kī hai
ye iltijā hai ki tū mujh ko vo ḳhudī denā

vasl kī iltijā pe bigḌe kyuuñ
sun ke chup ho raho savāl kā kyā

kohkan ko hai ḳhud-kushī ḳhvāhish
shāh-bāno se iltijā kiije

sab ġhalat-fahmiyāñ hī miT jātīñ
dil sazā-vār-e-iltijā na huā

ishq mānūs-e-iltijā na huā
husn āzurda-e-jafā na huā

bhiik meñ vo haath uTTheñ iltijā ke vāste
jin ko qudarat ne banāyā ho hinā ke vāste

na-jāne kaun se yūsuf kā jalva mujh meñ pinhāñ hai
zuleḳhā aaj tak kartī hai 'muztar' iltijā merī

maiñ reza reza badan kā uThā rahā huuñ 'adīm'
vo toḌ hī to gayā apnī iltijā se mujhe

mirī to hai baat zahr un ko vo un ke matlab hī kī na kyuuñ ho
ki un se jo iltijā se kahnā ġhazab hai un ko vahī na karnā

iltijā thī ek saada iltijā
apnī tanhā.ī meñ sochā kījiye

na aayā minnatoñ se yaar jis dam
to phir kyā kyā ajal ke iltijā kī

rañg laa.ī nā āḳhir tark-e-nāz-bardārī
haath joḌ kar us ko mahv-e-iltijā paayā

alag tū bazm se uTh kar jo sun letā to kah dete
ki kuchh kuchh iltijā ai zeb-e-mahfil ham bhī rakhte the

yārab ġhalat ho fahm-e-kaj-andesh kā gumāñ
kuchh kah rahā hai in se adū iltijā ke saath

kyuuñ shauq meñ girā.iye saath apne shān-e-ishq
aġhmāz bhī zarūr hai kuchh iltijā ke saath

din-Dhale hogā jashn-e-tanhā.ī
iltijā hai ġhamoñ se shirkat kī

tamām rañg jahāñ iltijā ke rakkhe the
lahū lahū vahīñ manzar anā ke rakkhe the

un kī shān-e-karam kah rahī hai 'rishī'
un se ab koī bhī iltijā jurm hai

kamāl ye hai ki duniyā ko kuchh pata na lage
ho iltijā bhī kuchh aisī ki iltijā na lage

ḳhudā kī bhī nahīñ sunte haiñ ye but
bhalā maiñ kyā huuñ merī iltijā kyā